Шымкентте коронавирустың таралуына жол берген 7 мектеп 1 млн теңге айыппұл төлейді

Шымкент қаласында оқушылары мен мұғалімдері індетке шалдыққан 7 мектеп айппұл төлейтін болды. Оның бесеуі - орта мектеп. Қалған екеуі физика-математика бағытындағы Назарбаев Зияткерлік мектебі мен жекеменшік «Бәйтерек» білім ұясы. Бұл мектептердің әрқайсысы 933 мың теңге айыппұл төлейді. 

Олар мұндай әкімшілік жауапкершілікке санитарлық - эпидемиологиялық нормаларды сақтамағаны үшін тартылып отыр. «Мәселен, №18 мектепте алдымен мұғалім, онан кейін 4 оқушы коронавируспен ауырған. Бұл мектепте сақтық шараларының дұрыс жүргізілмегенін айғақтайды»,-дейді мамандар. Бүгінде Шымкент қаласы бойынша тағы бір мектеп карантинге жабылып отыр. Ондағы санитарлық жағдай тексеріліп жатыр.  

Роза Аханова, Шымкент қаласы санитарлық-эпидемиологиялық бақылау департаментінің бөлім басшысы:

Карантинге жабылған мектептерде жиі кездесетін кемшілік мектептерде маскалық режим сақталмаған. Одан бөлек, кварц сәулесі дұрыс қолданылмайды. Сондай-ақ дезинфекциялық сұйықтықтармен тазарту дұрыс жүргізілмеген. Ғимарат алдына қойылған фильтрлер талапқа сай емес.  

Ғани Қалмаханов