Жаңалықтарды Telegram арнамыздан оқыңыз!Атырау облысындағы жеті ауданның бесеуінде мал азығы тапшы. Қыстың көзі қырауда тығыраққа тірелген қожалық иелері жеп-шөпті көрші облыстардан тасуға мәжбүр. Екі-үш жыл қатарынан жалғасқан қуаңшылықтан шабындыққа қылтанақ шөп өспеген.
Индер ауданының төскейіне мал өсіріп, пайдасын көрем деген Салауат Жұбанғали қазір қып-қызыл шығынға батып отыр. Өйткені, қорадағы 50 сиырға беретін азық жоқтың қасы. Былтыр алған 200 орам шөп көктемге жетпей түгесілмек.
Салауат Жұбанғали, шаруа:-Қыруар шығын. Жетпесе тағы аламын. 60-70-тей рулон қалған болар. Шөп жағынан қиналып тұрмыз.
Жандос Темірғали, тілші:-Кейде қыруар қаржыға сатып алынған мал азығы сапасыз болып шығады. Мәселен, мына шөп Батыс Қазақстан облысынан әкелінген. Құнарсыз болғандықтан мұны төрт-түлік жарытып жемейді.
Ал, Сембай Арыстанов Исатай ауданын сонау Оралға биылдыққа 10 рет барды. Мал азығын алыстан тасу шаруаға артық салмақ болып тұр.
Сембай Арыстанов, шаруа:-5-6 жыл болған болар шөп болмағынына. Үнемі тасып жүреміз. Исатай ауданындағы бәрінің жағдайы осындай.
Қуаңшылықтың кесірінен құрық ұстап қала жаздаған Сағат Садықов шөпті қолдан өсіруге көшкен. Бірақ пайдасынан шығыны шаш етек – дейді.
Сағат Садықов, қожалық жетекшісі:-Шабуы бар, тасуы бар, орауы бар дегендей қырғын шығын бар. Субсидия берсе кішкене өнімдеріміздің де бағасын төмен түсіреміз ғой.
Өңірдегі 7 ауданның бесеуінде қазір малдың азығы қат. Шаруалардың шығынын өтеу үшін былтырдан бері жергілікті бюджеттен субсидия ішінара ғана берілді.
Тілек Әміров, Облыстық ауыл шаруашылығы басқармасының бөлім басшысы:-Аудандар ішінде Мақат ауданындағы шаруашылықтардан субсидиялауға байланысты өтінімдердің түспеуіне байланысты субсидияланған жоқ. Жалпы, облыстың 7 ауданынан 208 шаруашылық құрылымдары бөлінген 699 млн қаражатты толықтай игерді.
Алдағы уақытта облыста қолдан шөп өсіру көзделген. Бірақ бұл тек жоспар ғана. Сондықтан, шаруаларға өзге өңірлерден жем-шөп тасып жан бағуға тура келеді.
Жандос Темірғали
