Жаңалықтарды Telegram арнамыздан оқыңыз!«Ауыл» партиясы «Бірлік» партиясымен бірікпейтін болды. Бұл туралы бүгін партияның кезектен тыс өткен XVII съезінде айтылды. Биыл көктемде «Бірлік» партиясы «Ауыл» партиясына қосылуға ұсыныс жасаған. Алайда бұл мәселені жан-жақты зерттеген жұмыс тобы бірігудің қажеті жоқ деген ұсыныс тастады. Зерттеудің нәтижесін көрген съез делегаттары да осыған келісті. Жиынға оффлайн және онлайн түрде қатысқан 81 делегаттың 72-сі осы шешімді қолдап дауыс берді.
Әли Бектаев, «Ауыл» халықтық демократиялық патриоттық партиясының төрағасы:
- «Бірлік» партиясын қаралаудан аулақпыз. Бірақ, саяси белсенділігі төмен. Екіншіден, «Бірлік» партиясының кадрлық потенциялы да онша жоғары емес. Дегенмен, «Ауыл» партиясының өзіндік жолы, бағдарламасы бар. Ең негізгі мақсат - парламенттік партия болу.
Съезде партияның саяси кеңесінің құрамы да өзгерді. Бұрын 23 адам еді, 29-ға өсті. Ал, саяси кеңес президиумының көлемі 9-дан 11-ге ұлғайтылды. Өйткені, партияның құрамы да жыл санап өсіп келеді. Мәселен, соңғы 5 жылда 47 мың адам қосылып, мүшелерінің жалпы саны 298 мыңға жеткен. Ал, оларды біріктіретін негізгі фактор - ауылдың инфрақұрылымын жетілдіру. Соңғы 10 жылда 1500-ға жуық ауыл қысқарып кеткен. Әсіресе, шекараның бойындағы ауылдар азайып барады. «Сол себепті ауыл шаруашылығын қолдау арқылы шалғайдағы мекендерге көңіл бөлу қажет», - дейді партия өкілдері. Әсіресе, майда шаруашылықтарға мемлекеттік қолдауды көбейтіп, кооперацияларды дамыту мақсаты тұр.
Амангелді Сейітхан
