Ұшақ апатына байланысты шетел парламенттерінің спикерлері көңіл айтуда - «Qazaqstan» Ұлттық телеарнасы

Ұшақ апатына байланысты шетел парламенттерінің спикерлері көңіл айтуда

28.12.2019
Ұшақ апатына байланысты шетел парламенттерінің спикерлері көңіл айтуда

Мәжіліс Төрағасы Нұрлан Нығматулиннің атына басқа елдердің Парламенттерінен ұшақ апатынан жолаушылардың қаза табуына байланысты көңіл айту жеделхаттары келіп түсуде.

«Армения Республикасының Ұлттық Ассамблеясы атынан және жеке өз атымнан «Bek Air» ұшағының апатқа ұшырауының салдарынан жолаушылардың қаза болуына байланысты қайғысына ортақтасып көңіл айтамын», - делінген Армения Ұлттық Жиналысының Төрағасы Арарат Мирзоянның жеделхатында.

Қырғыз Республикасы Жогорку Кенеш Төрағасы Дастан Жұмабеков те қазақстандық әріптесіне көңіл айту жеделхатын жолдады.

«Ресей Федерациясы Федералды Жиналысы Мемлекеттік Думасының депутаттары атынан және өз атымнан Сізден қаза болғандардың туыстары мен жақындарына көңіл айту және қолдау сөздерімді жеткізулеріңізді сұраймын және зардап шеккендердің тезірек сауығып кетулеріне тілектеспін», - делінген Ресей Мемлекеттік Думасының Төрағасы Вячеслав Володиннің жеделхатында.

Түркия Ұлы Ұлттық Мәжілісінің Спикері Мустафа Шентоп түрік халқы бауырлас Қазақстан халқымен орны толмас ауыр қайғы-қасіретті бөлісетінін атап өтті.

Хабарламаларға жазылу