Асқар Мамин ауа райына байланысты жолда қауіпсіздікті қамтамасыз етуді тапсырды - «Qazaqstan» Ұлттық телеарнасы

Асқар Мамин ауа райына байланысты жолда қауіпсіздікті қамтамасыз етуді тапсырды

24.12.2019
Асқар Мамин ауа райына байланысты жолда қауіпсіздікті қамтамасыз етуді тапсырды

Үкімет басшысы Асқар Мамин ауа райының қолайсыздығына байланысты жауапты органдарға жолдағы қауіпсіздікті қамтамасыз етуді тапсырды.

Үкімет отырысында Ішкі істер министрі Ерлан Тұрғымбаев өткен аптадағы жол қозғалысы қауіпсіздігінің күйі туралы баяндады.

«Өткен аптада ауа райына байланысты жол қозғалысы қиындады. Қар мен жаңбыр жауып, 11 облыста жол жабылды. Олар: БҚО, Ақтөбе, Жамбыл, Түркістан, Алматы, Қарағанды, Атырау, Ақмола, СҚО, ШҚО, Қостанай облыстары. БАҚ және СМС-хабарламалар арқылы жолға шықпау туралы ескертілді. Бірақ, осы ескертулерге қарамастан, көптеген жүргізуші жолға шығып кетті», - деді ол. 

Министрдің айтуынша, 16-22 желтоқсан аралығында 104 жол-көлік оқиғасы тіркеліп, соның салдарынан 39 адам көз жұмған. 

Осыған байланысты Үкімет басшысы құзырлы органдарға нақты тапсырма берді.

«Жүргізушілер мен жолаушылардың қауіпсіздігін қамтамасыз ету – аса маңызды міндет. Болжамдарға сенсек, алдағы уақытта ауа температурасы төмендейді. Осы ретте жолдағы жылыту және тамақтану пункттері дайын болуы керек. Өңірлердің әкімдіктері осы мәселені бақылауда ұстауы керек. Индустрия және инфрақұрылымдық даму министрлігі мен «Қазавтожол» компаниясы автожолдарды қардан тазарту үшін техниканы барынша тартуы тиіс. ІІМ автожолдарда кезекшілік және қауіпсіздікті қамтамасыз ету жөніндегі жұмысты жалғастырсын», - деді Асқар Мамин.



Хабарламаларға жазылу