Елімізде президенттік сайлау өтті - «Qazaqstan» Ұлттық телеарнасы

Елімізде президенттік сайлау өтті

10.06.2019

Сонымен, елімізде кезектен тыс Президент сайлауы аяқталды. Кеше өткен саяси дода - Қазақстан тарихындағы алтыншы бүкілхалықтық сайлау. Соның ішінде кезектен тыс өткен 4-ші сайлау. Алғаш рет жеті адам мемлекет басшысы лауазымы үшін саяси бәсекеге түсті. Бұған дейінгі рекорд 2005 жылы болған еді, ол кезде Орталық сайлау комиссиясы бес кандидатты тіркеді. Сондай-ақ, биылғы сайлау үміткерлер арасында тікелей эфирде дебаттың өтуімен де ерекшеленді.

Қазақстан президенттігіне үміткерлердің саны жетеу болды. Олар 4 партия, 3 қоғамдық ұйым атынан саяси бәсекеде бақ сынады. Республика бойынша 9968 сайлау учаскесі жұмыс істеді. Сондай-ақ, шетелдегі отандастарымыз да таңдау жасауы үшін әлемнің 51 мемлекетінде 65 учаске болды. Сайлаудың ашық әрі әділ өтуін қарауға әлемнің түкпір-түпкірінен мыңнан аса халықаралық байқаушы келді. Саяси науқанды өткізуге Орталық сайлау комиссиясына бюджеттен 9,4 миллиард теңге бөлінген. Соңғы мәліметке сүйенсек, кезектен тыс Президент сайлауында халықтың 77,4 пайызы дауыс берген.

Хабарламаларға жазылу