Алаш қозғалысының  100 жылдығына орай тың ғылыми еңбектер жарық көрді - «Qazaqstan» Ұлттық телеарнасы

Алаш қозғалысының  100 жылдығына орай тың ғылыми еңбектер жарық көрді

17.06.2017
Алаш қозғалысының  100 жылдығына орай тың ғылыми еңбектер жарық көрді

Биыл Алаш қозғалысына 100 жыл толады. Атаулы дата қарсаңында Тараз Мемлекеттік педагогикалық институтында «Алаш және ұлт қайраткерлері» және «Алаш және ұлт әдебиеті» атты кітаптар жарық көрді, деп хабарлайды оқу орнының ақпараттық-имидждік қызметі.

Ғылыми еңбек авторлары – педагогика ғылымдарының докторы, профессор Тұрсынай Әбдіқадырова мен ғылым магистрі Еділбек Әбдімомынов.

Монографиялық еңбектерде қазақ зиялыларының шығармашылық мұраларын зерделеу және оны бүгінгі күнмен байланыстыра отырып, жандандыру мәселелері қарастырылған.

Атап айтқанда, «Алаш және ұлт әдебиеті» оқу-әдістемелік құралында XX ғасырдың басындағы қазақ әдебиетінің тарихы мен даму үрдісіндегі өзіндік ерекшеліктері, сол кезеңдегі түрлі әдеби бағыттағы ақын-жазушылардың өмірі мен шығармашылығы жан-жақты сараланған. Сонымен қатар, оқу құралында студенттердің білімін тереңдетуге арналған тест тапсырмалары ұсынылған.

Кітап жоғары оқу орындарындағы «XX ғасыр басындағы қазақ әдебиеті» пәні мен жалпы орта мектептердің жоғары сыныптарында жүргізілетін «Алаштану» курсын оқытуда қолданылады.

Ал, қазақтың даңқты перзенттерінің ұлттық тіл мәдениеті мен ойлау жүйесіне, этнопедагогика саласын қалыптастыруға және әдебиет пен мәдениет салаларына қосқан үлестері «Алаш және ұлт қайраткерлері» монографиясында кеңінен қамтылған.

Кітап авторларының айтуынша, ғылыми еңбекте Тәуелсіздік, халықтар бірлігі сияқты құндылықтар өткен ғасырдың басындағы қазақ зиялыларының еңбектеріндегі орамды ойлармен байланыстырыла отырып зерделенген. Сондай-ақ, болашақ ұрпақты имандылыққа, адамгершілікке, отансүйгіштікке тәрбиелеудегі Алаштың арда азаматтарының пайымды пікірлерінің түйіндері сараланған.

Хабарламаларға жазылу