Жаңалықтарды Telegram арнамыздан оқыңыз!Мексикалық боксшы Сауль «Канело» Альварес пен оның командасы әлі бір жеңіліп көрмеген қазақстандық Геннадий Головкинмен кездесу өткізуге қарсы екенін мәлім етті.
«Мен жанкүйерлер арасындағы күмәнді сейілту үшін қазір-ақ Головкинмен кездесер едім. Алайда, менің командам оған қарсы, мен командаммен жұмыс жасауым керек», - деген Альварестің сөздерін ВКонтакте желісіндегі GGG ресми парақшасы келтірді.
Головкин мен Канело ағымдағы жылдың қыркүйегінде шаршы алаңға шығады деп күтілген. Бірақ, мамыр айында мексикалық WBC белдігінен бас тартып, жекпе-жек 2017 жылдың қыркүйегіне шегерілді.
Бұрын хабарланғандай, мексикалық былғары қолғап шеберінің промоутері Оскар де ла Хойя жекпе-жектің өтетінін растады: «Жұрт Головкин - «Канело» жекпе-жегін бір жылдан астам сұрады. Пакьяо - Мэйвезер кездесуін олар сегіз жыл күткен. «Канело» мен Головкин жекпе-жегі келесі жылы болады. Біз дайын болғанда оны өткізуге келісеміз. Канело 154 фунт салмақ дәрежесінде, Головкин - 160 фунт салмақ дәрежесінде жұдырықтасады. Канело 160 фунт дәрежесіндегі кездесуге дайын болғанда, біз оны ұйымдастырамыз».
inform.kz
