«Қазақстан-Семей» телеарнасы «Қазақстан-Өскемен» филиалына біріктіріледі - «Qazaqstan» Ұлттық телеарнасы

«Қазақстан-Семей» телеарнасы «Қазақстан-Өскемен» филиалына біріктіріледі

11.11.2015
«Қазақстан-Семей» телеарнасы «Қазақстан-Өскемен» филиалына біріктіріледі

Корпорацияның мемлекет аумағының 98 пайызына хабар тарататын және әр өңір орталығында орналасқан 13 облыстық және Семей қаласындағы 1 қалалық филиалы бар және ол мемлекеттік ақпараттық саясатты жүзеге асыратын «Қазақстан» Ұлттық телеарнасы Корпорацияның басты медиа-ресурстарының бірі.

1997 жылы өңірлерді әкімшілік реформалау кезінде Семей және Шығыс Қазақстан облыстары біріктіріліп, Шығыс Қазақстан облысы Өскемен қаласындағы бір орталыққа бағындырылды. Нәтижесінде, бір әкімшілік-аумақтық бірлікте бірін-бірі қайталайтын 2 телеарна қызмет атқара бастады. Бұл жағдай мемлекеттік қаражаттың тиімсіз жұмсалуына алып келді.

Бұдан басқа, «Ақпараттық Қазақстан – 2020» Стратегиялық даму жоспарына сәйкес, 2018 жылға қарай Қазақстан Республикасының барлық аумағы сандық хабар таратуға толығымен ауыстырылмақ. Яғни, 2018 жылы қызмет көрсетуі үлкен шығындарды қажет ететін аналогтық хабар тарату толығымен тоқтатылады. Сандық пакетке, қалалық деңгейдегі арналарды қоспағанда, барлық облыстық телеарналар енгізіледі.

Жоғарыда айтылғандарды негізге ала отырып, мемлекеттік қаражатты тиімді жұмсау мақсатында Корпорация «Қазақстан-Семей» телеарнасын «Қазақстан-Өскемен» телеарнасының құрамына қосу туралы шешім қабылдады. Сонымен бірге, Семей қаласының тұрғындар саны 339 мыңнан астам адамға жететінін және олардың басым бөлігі «Қазақстан-Семей» телеарнасының аудиториясын құрайтынын ескере отырып, телеарнаның материалдық-техникалық базасындағы танымал бағдарламаларды «Қазақстан-Өскемен» телеарнасының хабар тарату кестесіне қосу арқылы сақтап қала отырып, Семейде кеңейтілген тілшілер қосынын құру туралы шешім қабылданды.

Осы орайда, «Қазақстан-2050» даму стратегиясын, Елбасы Нұрсұлтан Назарбаевтың Ұлт жоспары - «100 нақты қадам» бес институционалдық реформасын, «Мәңгілік ел» патриоттық актісін, «Нұрлы жол» жолдауын және басқа да бағдарламалық құжаттарды орындау шеңберінде мемлекеттік ақпараттық саясаттың басым бағыттары бүкіл Шығыс Қазақстан облысын  хабар таратумен толық қамтитын «Қазақстан-Өскемен» телеарнасы арқылы жүзеге асырылатын болады.

Қазіргі уақытта Семей қалалық телеарнасының жаңа жағдайдағы өндіріс көлемін анықтау мақсатында Корпорация қызметкерлерінен тұратын арнайы жұмыс тобы құрылды. Оның қорытындысы бойынша штаттық құрамы шамамен 30 бірліктен тұратын жаңа штаттық кесте қалыптастырылмақ. Семей қаласы филиалында қызметінен босатылған барлық қызметкерлерге Корпорацияның өндірістік құрылымдарында, атап айтқанда Астана, Алматы қалаларындағы және басқа да облыстық филиалдардағы бос қызмет вакансиялары басымдық негізде ұсынылатын болады.

Мұнымен қатар, «Қазақстан-Семей» телеарнасының қаржылық қызметінің шығыны басым екендігін, атап айтқанда 158,5 млн. теңгені құрайтын жылдық жалпы шығынның құрылымы төмендегідей екенін атап өткен жөн:

-         жарнама қызметі есебінен түсетін коммерциялық кіріс «Қазақстан-Семей» филиалының жалпы кіріс сомасының 11 пайызын құрайды;

-         жергілікті бюджеттен кіріс сомасы 19 пайызды құрайды;

-         қалған шығын мемлекеттік бюджет есебінен дотацияланады.

Хабарламаларға жазылу