Жаңалықтарды Telegram арнамыздан оқыңыз!Т.Жүргенов атындағы Қазақ Ұлттық өнер академиясының түлегі Ұлағат Ақжолтай Мәскеудегі Суриков атындағы академиялық көркем сурет институтына ең жоғары 421 балмен 30 жылдан соң қабылданған жалғыз қазақ баласы.
Колледж қабырғасында жүргенінде-ақ, ерекше қабілетімен көзге түскен студенттің шығармалары кәсіби мамандардың жоғары бағасын алған. Ол Көкшетау қаласында өткен жас мүсіншілер байқауының бас жүлдесін жеңіп алса, 2013 жылы Санкт-Петербург қаласында өткен жасөспірімдер арасындағы көркемсурет байқауының жеңімпазы.
«Өнерге деген адалдығы жоғары. Болашақта қазақ өнерін дамытуға үлесімді қосамын дегенде ұстаз ретінде қатты қуанамын»,-дейді мүсін өнері бойынша жетекшісі Нұрғалым Баймұхаммедұлы.
Ұлағат сондай-ақ, бірнеше мәрте «Арт-самғау» көркем сурет фестиваліне қатысқан. 2014 жылы «Келін» атты композициясы ЮНЕСКО-ның ұйымдастыруымен жарыққа шыққан «Балалар әлемді бейнелейді» атты альбомға енгізілді.
«Үлкен профессорлар жұмыстарымды көрген кезде «Сенде бірнәрсе бар», деді. Бұл – менің осында оқып жүрген кезде ұстаздарымның берген тәлімінің нәтижесі. Менің басты мақсатым – шетелде білім алып, еліме оралып еңбек ету. Бар білімімді өзімнен кейінгілерге үйретіп, қазақ мүсін өнерінің дамуына үлес қосқым келеді»,-дейді жас өнерпаз.
Толығырақ «Таңшолпаннан» көріңіз.
