Жаңалықтарды Telegram арнамыздан оқыңыз!Мемлекет басшысы Украинаға жұмыс сапары кезінде Қазақстан мен Украина Тәуелсіздіктің барлық кезеңінде көптеген бағыттар бойынша тығыз ынтымақтастықта болғанына тоқталды. Бұл туралы Ақорданың ресми сайты хабарлады.
«Мен елдеріміз арасындағы достық және ынтымақтастық туралы шарттың қол қойылғанына 20 жыл толған жылы келіп отырмын. Өзара тауар айналымы 2010 жылдан 2013 жылға дейін екі есе өсті. Биыл ол төмендеп кетті, бұл біздің әлеуетімізге сай емес, себебі Украина – Қазақстанның маңызды сауда-экономикалық серіктесі», – деді Нұрсұлтан Назарбаев.
Қазақстан Президенті сондай-ақ, біздің елдің индустриялық-инновациялық даму бағдарламасы беретін мүмкіндіктер мен «Нұрлы жол» жаңа экономикалық саясатының негізгі бағыттары туралы айтты. Осыған байланысты Мемлекет басшысы Украина бизнесін аталған бағдарлама аясындағы перспективалы жобаларға қатысуға шақырды.
Өз кезегінде Украина басшысы Петр Порошенко Нұрсұлтан Назарбаевқа Украинаға қатысты немқұрайлы ұстанымда қалмағаны үшін шынайы ризашылығын білдірді.
«Сіз күрделі кезеңде бізді қолдау үшін менің шақыруымнан соң бірден келдіңіз. Менің жеке өзім де, Үкімет пен украин халқы да мұны жете бағалайды. Шынымен де, біз Қазақстан мен Украина арасындағы екіжақты қарым-қатынастардың әлеуеті әлі толық пайдаланылған жоқ деп санаймыз. Бұл мәселеге қатысты тиісті органдар ауқымды жұмыс жүргізуі қажет», – деді Украина Президенті.
П.Порошенко сондай-ақ, тамақ өнеркәсібінде, авиатехника құрастыру ісінде, әскери-техникалық және мәдени-гуманитарлық салаларда қарым-қатынасты жандандырудың маңыздылығын айтты.
