Жаңалықтарды Telegram арнамыздан оқыңыз!Кәсіпқой бокстан Дүниежүзілік бокс қауымдастығы Кариб теңізі аймағы тұжырымының (WBA-Fedeсaribe) иегері алдағы күндері АҚШ-та жол тартпақ.
«Жақында АҚШ-қа жол жүремін. Промоутерлік компания екі жекпе-жек ұйымдастырмақ. Бұл жаңа тұжырым аясында өтуі мүмкін. Әзірге, қай тұжырым екені нақты белгісіз. Алдымен, бір ай жаттығу өткізіп, жылдың соңына дейін жекпе-жекке шығамын. Ал, екінші жекпе-жек 2015 жылдың басында өтеді деген жоспар бар», - дейді ол.
Айта кетейік, Жанқош Тұраров кәсіпқой боксқа 2009 жылы келді. Шаршы алаңда 16 жекпе-жек өткізіп, барлығында жеңіске жеткен. 11 жекпе-жекті мерзімінен бұрын аяқтады. Ол 2013 жылы Доминикан Республикасының боксшысы Абрахам Перальтаны жеңіп, WBA-Fedecaribe белдігіне ие болды. Ал, биыл тек бір жекпе-жек өткізіп, чемпиондық атағын сәтті қорғады.
«Өткен жылы кәсіпқой шаршы алаңда 8 жекпе-жек өткіздім. Ал, биыл чемпиондық атағымды қорғап шықтым. Сол себепті промоутерім демалыс берді. Дегенмен, жаттығуды үзген жоқпын», - дейді Жанқош Тұраров.
Біздің анықтама:
Жанқош Тұраров
1990 жылы 20 қарашада дүниеге келген
Салмағы - 63.5 (Бірінші жеңіл салмақ)
Бапкері – Асқар Тұрлынов
Промоутер – Нельсон Лопес
Атағы - WBA-Fedecaribe белдігінің иегері
