Жаңалықтарды Telegram арнамыздан оқыңыз!1 қыркүйекте Алматы мектептерінде Білім күні мерекеленді. Қала әкімі Ахметжан Есімов жаңа Наурызбай ауданында орналасқан Р.Сәрсенбин атындағы №192 мектептің салтанатты шарасына қатысты. Бұл туралы Алматы қаласы әкімінің баспасөз қызметі хабарлады.
Мереке күні сөз алған шаһар басшысы биыл Алматы мектептерінде 188 мыңнан астам оқушы білім алатынын тілге тиек етті. Оның ішінде 24 мың бүлдіршін бірінші сынып оқушысы атанды.
Алматы шекарасы 23,2 мың гектарға ұлғайғандықтан, қала балансына 15 мектеп қосылды. Жалпы, шаһар көлемінде 201 мемлекеттік мектеп қызмет етуде.
«Қала аумағына өткен барлық 15 мектепке жаңа оқу жылына дайындалуы үшін, әрқасысына 3 миллион теңгеден бөлдік. Білім деңгейін жақсарту мақсатында, бұдан кейін де материалды-техникалық жабдықтауға тиісінше көңіл бөлмекпіз», - деді Ахметжан Есімов.
Қала басшысы Білім беруді дамыту жылы аясында Алматыда жаңа мектептер салынып, техникалық жабдықтау жаңартылғанын, жас ұрпақтың жоғары деңгейдегі білім алуы үшін қажетті жағдай жасалып жатқанына тоқталды. Одан өзге, Тамыз кеңесінде алматылық 1000 ұстаздың әрқайсысына 300 мың теңгеден сыйақы тағайындалғанын айтып өтті.
Сөз соңында шаһар басшысы оқушылар мен мұғалімдерді жаңа оқу жылымен құттықтап, сәттілік тіледі.
