Жаңалықтарды Telegram арнамыздан оқыңыз!Әсіресе, сүт безі, жатыр мойны, асқазан-өңеш және өкпе қатерлі ісігі жиі кездеседі. Облыстық онкологиялық орталықта жыл басынан бері 2300 адам емделсе, 300-ге жуық адам қайтыс болды.
Қала тұрғыны Бибісара Бекмағамбетова 2010 жылдан бері қатерлі кеселмен күресіп келеді. Қатерлі ісік өкпеде, қазір науқас облыстық онкологиялық орталықтың паллиативті бөлімшесінде ем алып жатыр.
Бибісара Бекмағамбетова, емделуші:
- 42 сәуле, 22 химиясын алдым. Дәрісінің бәрін толық алып жатырмын. Дәрінің бәрі бар. Ешқайда барған жоқпын.
Паллиативтік бөлімше алғашқыда 15 орынға лайықталды. Науқастардың көбеюіне байланысты тағы 15 орын қосылып, қазір мұнда 30 адамның ем алуына мүмкіндік бар.
Дана Әбдіқадырова, паллиативтік бөлімшенің дәрігер-терапевті:
- Бөлімшеде адам өте көп болады. Орын болмай қалады. 10 күн, 15 күн жатасың деп айта алмаймыз. Емделушінің жату күні белгісіз.
Мамандардың айтуынша, көп жағдайда адамдар дәрігерге ауруы әбден асқынғанда келеді. Қазір облыс бойынша 4700 адам диспансерлік есепке алынған. Оның ішінде 800-ден астамы биыл бірінші рет анықталып отыр.
Сәкен Серғазиев, облыстық Онкологиялық орталықтың директоры:
- «Онкологиялық науқас» деген бір күнде қойылатын диагноз емес. УЗИ әдістерімен, компьютерлік томографиямен қойылғанымен, біз дәлелдеуіміз керек, кистологиялық зерттеу өткіземіз. Оның бәрі уақыт алатын диагностикалық тәсілдер, сондықтан, осыдан наразылық тууы мүмкін. Көп адамдар бірден диагноз қойылмады деп ойлайды.
Қазір дәрігерлер ауруды ерте сатыда анықтауға баса назар аударуда. Қауіпті дерт неғұрлым ерте белгілі болса, соғұрлым оны емдеп-жазуға үміт мол. Бұл орайда мамандардың біліктілігін арттыру, қажетті құрал-жабдықтарға қол жеткізу мәселелері жергілікті бюджет есебінен шешімін тапқан. Ал, келер жылы жаңа орталықтың құрылысы басталады.
Ақерке БЕРІКБЕКҚЫЗЫ
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
