Жаңалықтарды Telegram арнамыздан оқыңыз!Соңғы жарты жылда республика бойынша 4600 адам ішек инфекциясын жұқтырған. Науқастардың арасында сальмонеллез дертіне шалдыққандардың саны көбейген. Бұл туралы бүгін баспасөз мәслихатында Қазақстанның бас санитарлық дәрігері Жандарбек Бекшин айтты.
Қазақстандық дәрігерлер инфекцияның 99 түрі бойынша халықты үнемі бақылауда ұстап отырады. Алайда, жыл сайын осы жаз мезгілінде ішек инфекциясын жұқтыру қаупі жоғарылайды,- деп дабыл қағады. Мәселен, қаңтар айынан бері 700-дей адам сальмонеллезға шалдыққан. Дегенмен, эпидемия деуге себеп жоқ. Өйткені, 10 мың адамның 50-і ауырса ғана жаппай эпидемия дәрежесі беріледі. Бас санитарлық дәрігер қазақстандықтарды жеміс-жидектерді жуып жеуге, қоғамдық орындарда тамақ алғанда оның құрамы мен дайындалу мерзіміне баса назар аударуға шақырды.
Бас санитарлық дәрігер тойда жаппай уланудың басты себебін де атады. Оның айтуынша, ауылды жерде той иелері тамақты үйден жасап апарады. Ал, мейрамxана әкімшілігі оған рұқсат беріп жатады. Сондықтан, қонақтар жаппай ұшынады. Жандарбек Бекшиннің сөзінше, аспазшылардың кәсіби дайындығын тексеру қажет. Ыдыс-аяқты жуып тұратын адамдардың саны да жеткілікті болуы шарт.
Шетелде демалатын қазақстандықтар инфекциялар мен аурулардан сақтануы үшін нені ескеруі керек? Жандарбек Бекшин бұл сұраққа да жауап берді.
Сырт мемлекетте тек бөтелкедегі немесе қайнаған суды ішіп, тексерілген қоғамдық орындарда тамақтану қажет. Сондай-ақ, ет, балық теңіз өнімдерін термиялық өңдеуден кейін тұтыну керек. Бассейндерде немесе арнайы су айдындарында ғана шомылуға болады. Бұған қоса, дененің ашық жерлеріне репелленттер жағып жүру керек.
Фариза МҰСАҚЫЗЫ
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
