Оқушылар Президент Жолдауын тікелей эфирден көреді

Астана қаласындағы Назарбаев Зияткерлік мектебінің оқушылары Елбасының Жолдауымен тікелей эфир арқылы танысады. Бұл туралы «Назарбаев Зияткерлік мектептері» ДБҰ баспасөз қызметі хабарлады.

Мектеп ұжымы, оқушылар мен ата-аналар Елбасы Нұрсұлтан Әбішұлы Назарбаевтың Қазақстан халқына Жолдауын білім ордасында тікелей эфир арқылы көреді. Одан кейін мектеп қауымдастығы: ата-аналар, оқушылар мен ұстаздар бас қосып, мемлекет басшысының Жолдауында аталған маңызды оқиғаларға тоқталып, өзара пікір алмаспақ.

Оқушылар мен мұғалімдердің айтуынша, кезекті Жолдау қызықты болып, онда көптеген көкейкесті мәселелерге қатысты жауап берілетіндігіне сенімді. Мәселен, әлемдік дағдарыс жағдайында мемлекеттің атқарар іс-шаралары, Елбасының қолданар саясаты тілге тиек етіледі деген үмітте. Сонымен қатар, ұстаздар қауымы биылғы Жолдаудағы басым бағыттардың бірі білім саласы болады деп есептейді.