Жаңалықтарды Telegram арнамыздан оқыңыз!Сербияда өткен бокстан дәстүрлі Ұлттар кубогында Қазақстанның қыздар командасы жалпы есепте бірінші орын иеленді. Отандастарымыз 6 алтын, 2 күміс, 4 қола медаль еншіледі.
Сербия халықаралық турнирінде Әлем чемпионы Дина Жоламан (54 кг), Валентина Хальзова (69 кг) Ләззат Күнгейбаева (+81 кг), Римма Волосенко (60 кг), Дариға Шәкімова (75 кг) және Фариза Шолтай (81 кг) жеңімпаз атанды. Айта кетерлігі, бұл турнирде біздің спортшыларымыз қарсыластарынан айқын басым түсті. Тіпті, финалдық кездесуде екі Қазақстан спортшысының кездескен кездері де болды. Атап айтқанда, 54 килограмм салмақ дәрежесінде финалдық кездесуде Жоламан -Тұяқбай жұбы, ал ,81 килограммға дейінгі салмақ санатында Шолтай - Маматқұлова алтын медаль үшін айқасты.
«Бұл турнир жыл басындағы дәстүрлі бой жазу саналады. Қыздар жаман көрсеткіш көрсеткен жоқ. Олар турнирден турнирге өткен сайын жақсы тәжірибе жинап, өздерінің дайындықтарын шыңдай түседі деп ойлаймын. Сербия турнирі - осы жылғы алғашқы жарыс және біздерге қалай жұмыс істеу қажеттігін көру қажет. Бұл негізгі жарыстар алдындағы тексеру десек те болады. 2017 жылы біз қыздар құрамасы үшін маңызды 17 халықаралық турнирге және Қазақстан чемпионаты мен Вьетнамда қазан айында өтетін Азия чемпионатына қатысамыз», - деді қыздар құрамасының аға жаттықтырушысы Вадим Присяжнюк.
