Жаңалықтарды Telegram арнамыздан оқыңыз!Астананың 20 жылдығын ерекше атап өтуге ірі компаниялар да атсалысты. Соның бірі - «ҚазТрансОйл» ұжымы. Қала күні қарсаңында қала ішінен этноауыл ұйымдастырып, өткеніміз бен бүгінімізден сыр шертетін көрмелер ұйымдастырды. Астанаға тарту жасауға компанияның барлық өңірдегі өкілдіктерінің қызметкерлері атсалысты.
Компания аймақтық ұжымдары этноауылда киіз үй тігіп, өз өңірлерінің ерекшеліктері туралы экспозициялар ұсынды. Мысалы, «ҚазТрансОйлдың» Маңғыстау бөлімшесі осы облыстағы тарихи-мәдени ескерткіштер жайлы көрме ұсынса, павлодарлық бөлімше «ҚазМұнайГаз» бен оның еншілес компанияларының Астанаға қосқан үлесін көрсеткен. Өзге өңірлерде «Рухани жаңғыру» бағдарламасымен үндес тақырыптарды қамтыған.
Асылбек Бишимов, «ҚазТрансОйл» ҰК» АҚ Жезқазған мұнай құбырлары басқармасының бастығы:
- Жезқазған мұнай құбырлары басқармасынан келіп отырмын. Ұлттық саябақтар Қазақстанның жер-жерінде орналасқан, солар туралы қысқаша көрсеттік.
«ҚазТрансОйл» компаниясы қайырымдылық ретінде тұрмысы төмен азаматтар мен ата-анасынсыз қалған балаларға, мүгедектер мен ардагерлерге арнайы экскурсия ұйымдастырды. Бұл акция аясында 500 адамға концерт ұйымдастырылып, оларға мерекелік дастархан жайылды. Жалпы, мереке күндері этноауыл халық көп келген қызықты орындардың біріне айналды.
Владислав Никитин, турист:
- Керемет. Біз жолдасымыз екеуміз қала сыртындағы этноауылға баруды ойлап жүрсек қала ішінде де мұндай жер бар екен. Киіз үйдің бәрін аралап көрдік. Барлығы тамаша. Өзім Ресейдің Томбы қаласынан келген туристпін. Астанаға соңғы рет алты жыл бұрын келгенмін. Адам танымастай болып өзгеріпті.
Этноауылдың жұмысы үлкен гала-концертпен қорытындыланды. Онда осы шараға атсалысқан компания қызметкерлері марапатталып, Айқын бастаған отандық эстрада жұлдыздары өнер көрсетті.
Дулат АБИБУЛЛАЕВ
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
