Жаңалықтарды Telegram арнамыздан оқыңыз!Осы аптада Мемлекет басшысы Нұрсұлтан Назарбаев жұмыс сапарымен Біріккен Араб Әмірліктеріне барды. Сапар аясында Абу-Дабидің тақ мұрагері, Біріккен Араб Әмірліктерінің Қарулы Күштері Жоғарғы Бас қолбасшысының орынбасары шейх Мұхаммед бен Заид Әл Наһаянмен кездесті.
Қос ел басшысы соңғы бір жыл ішінде бірнеше рет жүздесіп үлгерді. Қазақ Президенті екеуара кездесулерде жасалған уағдаластықтардың өз жемісін беріп жатқанына тоқталды. Ал, Мұхаммед бен Заид Әл Наһаян «Қазақ басшысының конфессияаралық келісімді дамытуға қосқан үлесін ерекше бағалаймын»,- деді.
2019 жыл бұл елде толеранттылық жылы деп жарияланыпты. Осы орайда «Қазақстаннан үйренеріміз көп», деп отыр.
Сондай-ақ, биыл Біріккен Араб Әмірліктері елдің негізін қалаған шейх Зайдтың 100 жылдығын атап өтті. Танымал тұлға көзі тірісінде Нұрсұлтан Назарбаевты ерекше құрметтеген екен. Абу Дабидің тақ мұрагері «Қазақ Президентіне деген бұл құрметіміз әлі күнге дейін бір мысқал төмендеген жоқ»,- деді. Екіжақты кездесуден кейін Мемлекет басшысы Абу-Дабидің асыл жерлерінің бірі шейх Зайд мешітіне барды. Танымал тұлғаның рухына дұға бағыштады. Сондай-ақ, мешіттің архитектурасымен танысып, Құрметті қонақтар кітабына қолтаңба қалдырды.
