Жаңалықтарды Telegram арнамыздан оқыңыз!Кез-келген қоғамның болмысын қалыптастырып, дамуын қамтамасыз ететін, сонымен бірге, айнала қоршаған әлеммен қарым-қатынасын жүйелейтін бірден-бір құрал – ол тіл. Егер де біз қоғамымыздың, ұлтымыздың дамуын, ілгері жылжуын қаласақ, тіліміздің де күнделікті талаптарға сәйкес өзгеріп отыратындығын қабылдағанымыз абзал.
Қазақ тілі қанша бай дегенмен, жиырмасыншы ғасырдың өн бойында көрген қыспағының кесірінен ана тіліміз біршама тоқырағанын мойындауымыз керек. Әсіресе, техникалық тіл мүлде мешеу халде қалды. Оның себебінің түп-тамыры әліппеміздің және соның негізінде дамитын тіліміздің әлемдік процестерді игере алмауында жатыр.
Тіл де кәдуілгі тал іспеттес. Оны үнемі баптап, суғарып отыру қажет. Сонда ғана ол өседі, сонда ғана ол көктеп, өз жемісін бере бастайды. Кейін жайқалған ағашқа айналып, оны баптаған халыққа өз көлеңкесінен пана береді. Сондықтан, бүгінгі таңдағы қазақ тілін латын қарпіне көшіру ісінен саяси астар іздемей, бұл бастаманы өз тілімізге, тамыры суала бастаған бәйтерегімізге жасалып жатқан қамқорлық деп бағалағанымыз жөн.
Ал бұл істе үлкен ыждағаттылық пен мұқияттылық қажет-ақ. Артық қыламыз деп тыртық қылып алмау керек бұл, шын мәнісінде, тарихи сәтте. Осы аптада латын қаріпі негізіндегі жаңа әліпбидің тағы бір нұсқасы кең талқыға түсті.
Айбек ҚОБДАБАЙ
