Жаңалықтарды Telegram арнамыздан оқыңыз!Қазақтың елі тұрақтылық пен ынтымақты, бейбітшілік пен сенімді әрі серпінді даму жолын таңдады. Сайлаудан кейінгі сан-алуан пікірлерді саралап, сұрыптай отырып осылай ой қорытуға болады. Сайлау аяқталып, алғашқы қорытындылар белгілі бола сала Нұрсұлтан Назарбаевты қолдаушылардың үлкен шоғыры Астанада бас қосып, жиын өткізді.
«Елбасымен бірге – жаңа жетістіктерге!» деп ұрандатқан көпшіліктің белсенділігі де сайлау күнгі халықтың ынтасынан бір мысқал кем болған жоқ. Елге белгілі азаматтар Нұрсұлтан Әбішұлын ел атынан сайлаудағы айқын жеңісімен құттықтады.
«Ең алдымен халқыма рахмет, бар қажыр-қайратым, білім-тәжірибем – ел үшін!», деді Мемлекет басшысы. Сондай-ақ, Президент халықаралық байқаушылармен кездесіп, арнайы баспасөз мәслихатын да өткізді.
Жеңімпаздың мерейі үстем. Қызыл-жасыл киінген жасөспірім-көкөрім, бозбала һәм бойжеткен, егде тартқан ер-азамат та, елге танымал тұлғалар да осында. Құтты болсын айта келген көңілді жұрттың жарқын-жарқын дауысы зәулім сарайды кернеп-ақ тұр.
Нұрсұлтан Назарбаев, Қазақстан Республикасының Президенті:
Ең бірінші алғысым – халқыма. Осы жылдардың барлығында қолдап, менің соңымнан еріп, екі шылбыр бір тізгінді қолыма беріп, сеніп келе жатқан осындай жаппай сенімді орындау мен үшін өте қадірменді міндет.
Сол міндетті атқару үшін күшімді де, денсаулығымды да, білімімді де, тәжірибемді де аямай қызмет етемін, деп Ант бергенмін, сол Антты орындап келе жатырмын.
Президент бұл сайлаудың жинақы да түзу өтуіне белсенді атсалысқан «Нұр Отан» партиясы мүшелерін, қоғамдық штабтың өкілдері, он мыңнан астам сенімді өкілдеріне де алғысын айтты. Сонан соң, дәл осы сайлауда ерекше белсеніп дауыс берген, елдің бүгіні мен ертеңіне енжар қарамаған жас буынды бөліп атады.
Нұрсұлтан Назарбаев, Қазақстан Республикасының Президенті:
Белсенді қатысқан жастарға ризашылығымды білдіремін. Барлық істеліп жатқан шаруа Қазақстанымыздың болашағы, Тәуелсіздігіміздің тұғыры биік болуы үшін, мәңгілік болуы үшін істеп жатырмыз, ол жастар үшін, болашақ үшін деген сөз. Жастардың жақсы білім алып, денсаулығы мықты болып, Отанын сүйіп, елі үшін қызмет етеді, деп сенемін.
Бұл сайлау біздің жұрттың бірлікте екенін жаһанға тағы бір мәрте дәлелдеді, деді Президент. Электораттың 95 пайызынан астамы сайлауға келуі бізде бұрын болмаған, жаһан тарихында сирек құбылыс. Елге тұтқа болған азаматтар ел атынан елдің басшысына құтты болсын айтты.
Қуаныш Сұлтанов, ҚР Парламенті Мәжілісінің депутаты:
Бұл жеңіс сіздің орасан мемлекеттік-қайраткерлік еңбегіңізден қуаттанған, болашағы айқын, ынтымағы жарасқан бүкіл қазақстандықтардың, Тәуелсіз Қазақстан мемлекетінің жеңісі. Сіздің халықаралық, ғаламдық, бүкіл еларалық қарым-қатынастағы абырой-беделіңіздің жеңісі. Сіз Нұрсұлтан Әбішұлы, ұлттың руһын, ұжданын, санасын, сапасын көтердіңіз.
Сайлаушылардың бір шоғыры осы жеңімпаздар форумында. Барлығы да елдің бірлігі мен ынтымағы үшін, болашағы үшін дауыс бердік, деседі.
Қала тұрғыны:
Елбасымен еліміз көркейеді, сондықтан, Елбасына дауыс бердім. Елбасымен біргеміз.
Қала тұрғыны:
Бұл сайлау бүкіл қазақстандықтардың бір ниетте, бір тілекте, бір жүректе екендігін айқын белгіледі. Біз соның куәсі болдық. Сондықтан, Қазақстан алға!
Қала тұрғыны:
Қазақстан Президенті Нұрсұлтан Назарбаевқа дауыс бердім. Құтты болсын, Қазақстан алға!
Бұл енді «Қазмедиа орталығы». Жастар жиналып флеш-моб өткізді. Бірлікті, ынтымақты, қоғамдық белсенділікті насихаттады жастар. Арасында өнер қайраткерлері, депутаттар мен медиа құрылымдардың танымал өкілдері де болды. Сайлауда дауыс беру белгісін бейнелеген өнерлері аса сәтті шыққандай.
Негізі мұндай флеш-мобтар мен мерекелік жиындар біздің шалқар еліміздің, біздің дархан даламыздың әр өңірінде, әр қаласында өтіп жатты. Естеріңізге тағы да сала кетелік, Президент сайлауына әлемнің 40 елінен бір мыңнан аса байқаушы, 28 елден 170 журналист келді. Сондай-ақ, халықаралық 8 ұйымның өкілі бар. Нұрсұлтан Назарбаев Ақордада байқаушылардың бір шоғырымен кездесіп, пікір алмасты.
Нұрсұлтан Назарбаев, Қазақстан Республикасының Президенті:
Халықтың сайлауда көрсеткен зор сенімі менің өзіме және мемлекет алдында қойған міндеттерді кедергісіз жүзеге асыруға мүмкіндік береді. Мен сіздерге келіп, науқанға қатысқандарыңыз үшін шынайы алғысымды білдіргім келеді. Және сіздер беретін баға объективті болады, деп үміттенемін.
Ивета Григуле, Еуропалық Парламент депутаты:
Президент мырза, мен кеше Қазақстан азаматтары тұрақтылық пен ел экономикасының дамуы үшін және мемлекеттің бұдан да әрі көркеюі үшін дауыс берді, деп ойлаймын. Ал, біз халықтың таңдауын құрметтеуге міндеттіміз.
Карен Штренц, ГФР Бундестагының депутаты:
Сайлауды ұйымдастыру деңгейі өте жоғары болды. Мен өзім байқаған учаскелерде ешқандай заң бұзушылықты көрмедім. Барлығы да жүйелі жүргізілді. Сондықтан, нәтижесі де жоғары болып тұр. Сізді құттықтаймын.
Рикардо Мильори, Еуропадағы қауіпсіздік және ынтымақтастық ұйымының экс-төрағасы:
Мәртебелі Президент мырза, мен ең әуелі Италия үкіметі мен парламенті атынан сізді даусыз жеңісіңізбен құттықтаймын. Халықаралық қауымдастық атынан сайлаудың еркін, әділ және ашық өткенін айтқым келеді. Біз сайлаудың барлық талаптарға сай өткенін мәлімдейміз. Кешегі саяси дода өзге елдерге үлгі боларлықтай.
Даниель Витт, халықаралық байқаушы (АҚШ):
Құрметті Нұрсұлтан Әбішұлы, мен үшін сіздің елдегі сайлауға үшінші рет қатысу мәртебе. Бұл жолғы сайлау халықтың болашақ үшін батыл қадам жасағанын көрсетті. Біз өз тұжырымдарымызды АҚШ-тың атқарушы органдарымен Конгресіне жібереміз.
Бұл енді баспасөз мәслихаты. Мемлекет басшысы Нұрсұлтан Назарбаев – елдің және шетелдің бірнеше журналисіне сұхбат берді. Саясат, экономика, қаржы, әлеумет, мәдениет, руһаниат әрине, сайлау сипаты да ұмыт қалған жоқ. Алғашқы сауал «Қазақстан» Ұлттық телеарнасынан.
Тілші:
Өткен жолғы саяси дода кезінде «Әдетте, Президент сайлауы халықты, елді түрлі саяси жікке бөледі. Ал, біз жұмыла білдік», деген едіңіз. Сіздің ойыңызша, бұл жолғы сайлаудың сипаты қандай?
Нұрсұлтан Назарбаев, Қазақстан Республикасының Президенті:
Бөліну емес, бірігу қажет. Қазақтың тарихының өзі солай, ылғи бірігу үшін күресіп келе жатырмыз. Қазір де сол бағытты ұстайтын боламыз.
Сайлау өтісімен қазақтың теңгесі құнсызданады-мыс. Бұл қауесет біздің қоғамда жиі айтылды. Сарапшылар да сан мәрте болжам жасады.
Нұрсұлтан Назарбаев, Қазақстан Республикасының Президенті:
Сайлаудан кейін күрт өзгеретіндей ештеңе де болмайды. Қалай жұмыс істедік, солай істей береміз. Бұған дейін ескерткенімдей, девальвацияға ешқандай негіз жоқ. Қазақстандықтар мені біледі, егер сондай бір жағдай бола қалса, мен өзім айтамын. Одан қорғанудың, сақтанудың да керектігін мен ескертемін.
Валюта құны нарыққа байланысты. Түбінде мемлекет теңге бағамын шым-шымдап еркіне жіберуі де бек мүмкін. Бірақ, бүгін-ертең емес. Оған отандық қаржы жүйесі дайын болуы керек.
Нұрсұлтан Назарбаев Қазақстан Республикасының Президенті:
Бұл – күрделі мәселе. Біз мұны Халықаралық валюта қорымен бірлесіп реттейміз, олар бізге техникалық кеңестер береді. Ал, оны жүзеге асыру бес жылсыз болмайды. Ол үшін теңгенің бағамы шетелдік валюталарға қарағанда еркін болып, конъюктураларға, көрші валюталарға қарай өзгеруі тиіс. Біз осы бағытта жұмыс істеп жатырмыз.
Қаржы жүйесіне қатысты гәп осындай. Ал, ішкі-сыртқы саясатта шұғыл қимыл болмайды. Қазақстан кез-келген елмен тең дәрежедегі достық ниеттегі қарым-қатынастан таймайды. Мұны да Президент айтты.
Нұрсұлтан Назарбаев, Қазақстан Республикасының Президенті:
Ең қауіптісі, мемлекетте қандай да бір жаңа өзгеріс жасау. Менің ойымша, кешегі сайлау халық қандай бағытты ұстанып отыр, соның айғағы. Сондықтан, бізге сыртқы саясат тұрмақ, ішкі саясатты өзгертуге еш негіз жоқ.
Елдің өз ішіндегі негізгі бағыт – дамыған 30 елдің санатына қосылу. Ол үшін 5 бағытта жүйелі реформа жүреді.
Еркін ТАҢАТҚАНҰЛЫ
