Жаңалықтарды Telegram арнамыздан оқыңыз!Алматы қаласының Төтенше жағдайлар департаменті сел қаупін автоматты түрде бақылайтын жоба жасап жатыр. Жоспар бойынша жоба қолданысқа келер жылы енгізіледі. Ал, әзір мамандар жағдайды бұрынғы әдіспен қадағалап жүр. Олардың бағалауынша, Алматыдағы температураның бірнеше күннен бері жоғары болып тұрғанына қарамастан, селден айтарлықтай қауіп жоқ. Дегенмен, арнайы қызмет таудағы көлдерді тікұшақпен тағы да бақылап қайтты.
Алматы қаласының маңайында ірілі-ұсақты 37 мореналық көл бар. Олардың 15-і сел тасқынына қауіпті, 8-і аса қауіпті болып саналады. Бірақ, биыл Төтенше жағдайлар департаменті мен «Қазселденқорғау» мекемесінің мамандары олардың су көлемін азайту үшін барынша күш салып жатыр.
Ерлан Әлібеков, қалалық Төтенше жағдайлар департаменті бастығының орынбасары:
- Қазіргі таңда 8 мореналық көлде 1,5 миллион текше метр су бар. Соның бәрі осы сорғы, сифондар, эвакуациалық каналдар арқылы төмен түсіріледі.
Көлдердің су көлемін азайту үшін республикалық бюджеттен 46 млн. теңге бөлінген. Сондай-ақ, 2016 жылы қала әкімінің қолдауымен алынған жоғары өнімді 5 сорғы мен диаметрі 315 мм-лік сифондар бар. Қазір 135 адам көлдердің арнасын кеңейту, тереңдету мен тазарту жұмыстарына жұмылдырылған.
Самат Дәуленханов, «Қазселденқорғау» мекемесі Алматы қалалық пайдалану басқармасының басшысы:
- Биылғы жылы Қарғалы бассейнінде №3 көл жаңадан пайда болды. 25 маусымнан бастап көлді қауіпсіздендіру жұмысын бастап кеттік. Көл пайда болған кезде 30 мың текше метр су болса, қазір деңгейін 9 мың текше метрге дейін түсірдік.
Қазір барлық көлдердің қасында күніне үш уақыт бақылау жасайтын 8 тұрақты бекет пен 13 кезеңдік бекет ашылған. Олар арнайы керек-жарақпен жабдықталған, 7 модульді тұрғын үймен қамтамасыз етілген. Өйткені «Қазгидрометтің» болжауынша, шілде айындағы орташа температура 25 градусқа тең. Яғни, қалыпты нормадан 1 градус жоғары. Сондықтан, мамандар сақтық шараларына аса мұқият болуға шақырады.
Аманкелді СЕЙТХАН
«YouTube»-тағы «Qazaqstan TV» арнасына жазылып, AppStore және Google Play сервистерінен «Qazaqstan TV» мобильді қосымшасын тегін жүктеп алыңыз.
