Жаңалықтарды Telegram арнамыздан оқыңыз!Әдетте, Отан қорғаушылар күні десе, тек ерлердің мерекесі деп қабылдап, бар қошемет-құрметті соларға арнаймыз. Дегенмен, Қарулы күштің қатарында 8000-ға жуық әйелдің еңбек ететінін ескерсек, әлбетте, бұл мейрам оларға да ортақ. Кешегі Әлия мен Мәншүктей мерген, Хиуаздай батыл қыздарымыздың жолын қуған арулар бүгінгі қоғамда да баршылық. Тілшіміз Раушан Сайлауқызы нәзіктілігіне қарамастан әскери қызметтің қыр-сырын жете меңгерген қыз-келіншектермен тілдесіп келді.
Әскери қызметтегі әйел десе, көз алдымызға әдемі форма киіп, жылы кабинетте отыратын қыз-келіншектер елестейді. Бірақ, әсте олай емес. Қарулы күштегі қыздардың осалы жоқ. Бірі әуе кеңістігінде алып құсты бағындырса, енді бірі кеудесін оққа тосып, ел қорғап жүр.
Бүгінде қатерден қаймықпаған қазақстандық қайсар қыздар көкте, жерде тіпті суда да ерлермен тең қызметті атқарып жүр. Бірі ұшқыш, енді бірі барлаушы, десантшы, парашютші, байланысшылар да баршылық. Әскери медициналық қызметкерлердің де дені әйелдер. Мамандығының мақтанышына айналған аруларымыздың бірі - Ардана Ботай. Ол биыл тұңғыш рет әуе кемесін өзі басқарып, әскери ұшақтың тізгініне отырды.
Ал, Жанар Ыбыраева ТМД бойынша кеме экипажында еңбек ететін жалғыз теңізші қыз. Ол «Орал» зымыранды-артиллериялық кемесінде байланысшы қызметін атқарады. Уақытының көбін теңізде өткізетін жас ару түрлі қиындықтарға қарамастан өз жұмысына сүйіспеншілікпен қарайды.
Осылайша, 7900 әйел әскери салаға еңбегін сіңіріп жүр. Бұл жалпы құрамның 12 пайызы. Олардың ішінде 1 генерал 2 полковник, 9 подполковник, 57 майор, 73 капитан, 121 аға лейтенант және 50-ге жуық лейтенант бар.
Әуе қорғаныс күштері. Мұндағы әйел азаматшалардың басым бөлігі әскери ұшақтармен байланыс орнатады. Өтінім қабылдайды. Ұшу бағыттарын жоспарлайды. 20 жылға жуық тәжірибесі бар диспетчер Ольга Шаханованың да жұмысы 24 сағат қауырт.
Әскери қызмет – ауыр міндет. Кейде нәзік жандыларды қойып, ерлердің өзі шыдамай жататын ауыр салаға келу – батыл әйелдерге тән қасиет. Ыстығына күйіп, суығына төзіп, темірдей тәртібіне көніп отбасы мен қызметті қатар алып жүргендердің қатарында Сәлима мен Рауан да бар.
Сәлима Жұматаева, Корреспонденттік желілер және бағыттау бөлімінің бастығы:
- Ең бірінші келген күнім есімде. Келдім әскери парад ұйымдастырылып жатты. Көптеген байланыс арналары құрастырылып қамтамасыз етіліп жатты. Сондай қарбаластық болып жатты. Сол кезде мен таңқалып, осындай қарбалас, жүгіріс пе екен деп қарап отырғаным есімде. Бастығым «провод» дегеннің не екенін білесің бе деп сұрағаны есімде. Иә, білем деген едім. Сол күннен қызметім басталып кетті.
Рауан Құмыртай, диспетчер:
- Ер адам әйел адамға қарағанда мықтырақ деп айтады. Бірақ, қыздың қырық жаны бар дегендей әйел адамдар үйді де қатар алып жүреді. Түзде де өзін ұстай алу, Отан қорғау деген алдымыздағы парызымызды өтеу де жауапты іс. Сондықтан, қыздар бұл міндетті ер адамдардан кем орындамайды.
Ал, мынау құрлықтағы 68665 әскери бөлімінің штабы. Түрлі маман иелері бола тұра, арулар жауынгерлік тактиканың қыр-сырын жете меңгерген. Себебі, әскери салада білімділік қана емес, біліктіліктің рөлі зор. Шыныққан шымыр қыздар күнделікті жаттығу жұмыстарын жасайды. Атыс аймағына барады, ұрыс даласында сынақтан өтеді. Тіпті айлап, апталап үй бетін көрмейтін күндері болады. Бастысы, олар жаудан қорғанудың әдіс-тәсілдерін де әбден үйренген.
Базаргүл Ыбыраева, 68665 әскери бөлімі байланыс ротасының телеграфисі, кіші сержант:
- Жеті күн ішінде біздің аруларымыз жұмыс жасайды. Бірге атысамыз. Бірге жүгіреміз. Қандай салада ер азаматтарымыз жұмыс атқарады, біз де сол жұмысты атқарып жүрміз.
Отан алдындағы міндетін абыроймен атқарып жүрген аруларымыз ел басына күн туса, атқа қонып, қолына қару алудан қаймықпайды. Нәзіктігі өз алдына, жинақылық, ептілік, батылдылық қасиеттер де осы арулардың бойынан табылады. Елім десе еміреніп, ерлігімен, өрлігімен көзге түскен Әлия мен Мәншүктің ізбасарлары қаншама?! Біз көрсеткен қыз-келіншектер солардың тек бір парасы.
Раушан САЙЛАУҚЫЗЫ
