Жаңалықтарды Telegram арнамыздан оқыңыз!Ақтауда алғаш рет технороботтар көрмесі ашылды. 20 робот би билеп, ән салып, тіпті сөйлеп, көрермендерді таңғалдырды. Олар қажет болса, мінез көрсетіп, түрлі қимылдар да жасайды.
Көрмеге қойылған 20 роботтың әрқайсысы әр түрлі іс-қимылдарымен ерекшеленеді. Солардың бірі - «Робосайпен» деп аталатын мына құлтемір. Ол адамның қимылына қарай қозғалады және биі де айрықша.
Денис Юн, экскурсия жөніндегі менеджер:
Біздің негізгі көздегеніміз - Қазақстанға роботтардың түрін жеткізу. Осы салада қандай жетістіктер бар екенін халыққа көрсету. Мәселен, біз болған өңірлерде роботтар жасайтын үйірмелер бар екен. Бұл жерлерде балалар робот құрастырып үйреніп, тәжірибелерін шыңдайтын көрінеді. Тек бағдарламалар ғана ішіне енгізілмейді екен.
Құлтемірлердің қай-қайсысының да құны қымбат. Бағасы бірнеше мыңдаған долларды құрайды. Бұл техникалар Жапония мен АҚШ-тан жеткізілген. Бұған дейін еліміздің 12 өңірін аралап үлгерді. Көрмеге келушілер әр экспонатпен суретке түсіп, қызыққа кенеліп жатыр. Тамашалап келушілердің ішінде ересектер де баршылық. Мәселен, 42 жастағы Виктор Белков ақпарттық технология саласының маманы. Роботтар оның өзін таңғалдырып отыр.
Виктор Белков, Ақтау қаласының тұрғыны:
Бұл жерге келіп өз көзіммен жапондық ғалымдардың еңбегін көрдім. Өте әсерлі. Әсіресе, маған Валли роботтары ұнады. Сондай-ақ, «Жұлдызды соғыс» фильміндегі кейіпкерлерді көріп балалық шағым есіме түсті. Тіптен 150 бағдарламасы бар роботтарды көріп, таң тамаша болдым.
Нұржан Жақсылық, Ақтау қаласының тұрғыны:
Маған көрмедегі барлық роботтар ұнады. Оларды көбінесе мультфильмдерден көріп тамашалайтынмын. Енді,міне, арнайы келіп, көзіммен көрдім. Мені кішкентай динозавр мен түрлі мультифильм кейіпкерлері қызықтырды. Осыны көру үшін қатты асықтым.
Мұнда фильм кейіпкерлері мен шимпанзе кейпіндегі құлтемірлер көпшілікті таңғалдырды. Көрме ақпанның 9-на дейін жалғасады.
ЖАЗИРА ӘБІЛ
