Ата Заң – елдігіміздің тұғыры - «Qazaqstan» Ұлттық телеарнасы

Ата Заң – елдігіміздің тұғыры

30.08.2025

Алматы – тәуелсіздіктің алтын бесігі. Ол – Қазақстан тарихындағы ең маңызды саяси оқиғалардың куәсі болды. 1995 жылы дәл осы шаһарда жаңа Конституция қабылданып, жас республиканың болашақ бағыты айқындалды. Осылайша еліміз демократиялық, зайырлы және құқықтық мемлекет ретінде алға қадам басты. Басты құжат туралы тарихшы, заңгер және саясаттанушылардың пікірі келесі материалда.

1995 жылғы Конституция – ел тарихындағы ерекше белес. Бүкілхалықтық референдум нәтижесінде қабылданған жаңа Ата Заң мемлекеттік билік тармақтарының тепе-теңдігін бекітіп, ең бастысы – адам құқықтары мен бостандықтарын заңмен қорғауды қамтамасыз етті.

Досалы Салқынбек, тарихшы:

Еліміздегі құқықтық-реформаларды іске асыруда осы 30 жылдың ішінде қабылданған Конституциямыз үлкен рөл атқарды. Өзіндік жолы бар, тарихи шешімдері бар. Қазақстан Тәуелсіз мемлекет болып тұрғанда Ата Заңымыз дамиды. Өйткені бұл бүкіл заңдарымыздың түп қазығы. Егер Ата Заңымыз жақсы жасалған болса, соған ілесе басқа заңдар да өркендейді, өседі.

Ата Заң – елдігіміздің тұғыры! Басты құжатта ең маңыздысы азаматтардың құқығы мен еркіндігі ең жоғарғы құндылық ретінде айқындалды.

Бақытқали Көшпенбетов, заңгер:

Халық еркін болу керек. Бірақ заңды жақсы түсінуі керек. Және соны өзі жүрегімен орындауы керек. Өйткені, әрбір адамның орындап отырған заңының барлығы тек қана өзі үшін емес, өзі үшін және қоғам үшін, болашақ ұрпақ үшін қажетті нәрсе жасалып жатыр деп түсіну керек.

Ата Заңның қағидаларын берік ұстану заңдардың қызмет аясын кеңейтіп, құқықтық мемлекет пен азаматтық қоғамның үдемелі дамуына жол ашады, - дейді сарапшылар.

Жомарт Сімтіков, саясаттанушы:

Заң мен тәртіп бүгінгі таңдағы қоғамның өзекті мәселесі ретінде қойылып отыр. Бұл жерде біріншіден, Ата Заңды білу керек. Екіншіден осы заңды орындау қажет. Тек қана осы Ата Заңды біліп қана қоймай, оған жауапкершілікпен қарау мәселесі қойылып отыр деп есептеймін.

Конституция – елдің тұрақтылығы мен дамуының кепілі. Ал Алматы сол тарихи бет бұрыстың куәсі болып қала бермек. Себебі, бұл алып әрі асқақ шаһарда мемлекет тағдырын шешкен маңызды шешімдер қабылданған.

Қуан Нұрақын


Хабарламаларға жазылу