Жаңалықтарды Telegram арнамыздан оқыңыз!Ақтөбелік жас ғалымдар жұмыс тиімділігін арттыруға арналған инновациялық жоба дайындады. Веб қосымшаны қазір өңірдегі мұнай өңдеумен айналысатын ірі компаниялардың бірі сатып алып, іс жүзінде қолданып келеді. Аймақтағы ең ірі жоғарғы оқу орны «Үздік университеттердің нақты сектормен байланысын нығайту керек» деген Мемлекет басшысының тапсырмасына орай жас ғалымдарға деген қолдауды арттырған. Бұл жұмыстар нәтижесін беріп те жатыр.
Роман мен Рамзан айти саласында табысқа жетуді бала күндерінен армандаған. Жұбанов университетінде алғашқы курстардан бастап-ақ инновациялық жобалар дайындауға ден қойған. Нәтижесінде олардың еңбегі ақталды. Веб қосымша мұнай компаниясының жұмысын жеңілдеткен. Компьютер арқылы кен орнындағы қызметкерлердің жүріс-тұрысын, қозғалысын онлайн режимде бақылап отыруға болады. Сондай-ақ атқарылған жұмыс көлемі туралы ақпарат бұрынғыдай жарты тәулікте емес, бар болғаны 1-2 сағатта беріледі.
Роман Соколов, Қ.Жұбанов атындағы Ақтөбе өңірлік мемлекеттік университетінің магистранты:
Серіктесім Рамзан екеуміз мұнай компаниясынан оқу тәжірибесінен өттік. Бізге олар жұмыс сапасына мониторинг жасауға ыңғайлы бағдарлама қажет екенін айтты. Біз ойлап тапқан қосымша бәрінің көңілінен шықты. Диспечерлер мәліметтерді жедел алады. Соның арқасында кен орнындағы ақауларды тез әрі оңай жоюға болады.
Жас ғалымдар кен орнына да арнайы барып, қосымшаны одан әрі жетілдірген. Соның арқасында коммуникациялық желілердің жұмысы 20-30 пайызға дейін жеделдеді. Енді ақауларды алдын-ала болжауға болатын бағдарлама жасау жоспарланып отыр.
Әлия Қайыпова, жоба жетекшісі:
Осы тақырыпқа қосымша жасанды интеллект қоса алсақ, тағы бір жобаны шығарамыз деген ойдамыз. Қоймадан транспортировка, соңғы тұтынушыға дейін жүретін программа. Ол да қазір дайын. Бірақ компанияға енген жоқ.
Университетте жас ғалымдардың идеялары қолдаусыз қалмайды. 2021 жылы бұл мақсатқа 300 млн теңге бөлінсе, қазір ол 2 миллиардқа дейін өсті. Яғни білікті, озық ойлы мамандарға әр жоба үшін үш миллион теңгеге дейін сыйақы тағайындалады.
Лаура Қарабасова, Қ.Жұбанов атындағы Ақтөбе өңірлік мемлекеттік университетінің ректоры:
Көбіне ғалымдар ғылым саласында қала береді де, шынайы өмірде бизнес саласында, кәсіпкерлікте, өндірісте қандай проблемалар барын білмей қалады. Біздің арнайы офистің басты мақсаты – сол ғалымдардың өндіріспен, бинзеспен интеграцияландыруға көмектесу. Екі коммерцияландыру жобасын іске қостық, өндірісті іске қостық, биыл сол офисті Департамент қылып өсірдік.
Өңірдегі жас ғалымдар қоршаған ортаның тазалығына байланысты және мүмкіндігі шектеулі жандарға арналған түрлі инновациялық идеялар ұсынып отыр. Бұл жобалардың да өндірісте қоданылатын күні алыс емес.
Жақсыбек Кемал
