Жаңалықтарды Telegram арнамыздан оқыңыз!Биылғы футбол мауысымы - Қазақстан үшін үлкен мереке болғалы тұр. Жанкүйерлер әсіресе, «Реал Мадридпен» болатын матчты асыға күтері сөзсіз. Тіпті, билеттер 5 минуттың ішінде сатылып кетуі ғажап емес, дейді спорт комментаторы Әлімжан Асқар. Айтуынша, бұл кездесу алматылық «Қайрат» үшін тәжірибе жинауға және футболсүйер қауымға қуаныш сыйлаудың мүмкіндігі болмақ. Қазақстандық көрермен үшін мұндай ойындар сирек кездесетін мүмкіндік. Сондықтан, әр матчты ерекше ықыласпен қабылдары сөзсіз, дейді. Еске сала кетсек, алматылық клуб биылғы маусымда іріктеу кезеңін сәтті өткізіп, қазақ футболының жаңа тарихын жазды. Атап айтқанда, словениялық «Олимпияны», финляндиялық «КуПС»-ты, словакиялық «Слованды» жеңіп, сенсация жасады. Ал, плей-офф кезеңінде шотландиялық «Селтикты» қапы қалдырды.
Әлімжан Асқар, спорт комментаторы:
«Қайраттың» мүмкіндіктері қандай? Әрине, басты мақсатты алматылық клуб орындап қойды. Олар осы 36 мықты клубтың қатарына енді. Біз үшін іріктеу - басты турнир. Финалында «Селтикке» қарсы ойнадық және жеңіске жеттік. Әрі қарай матчтар жай ғана жанкүйерді қуанту үшін, қазақ халқын шаттыққа бөлеу үшін болады, деп білеміз.
Асылбек Данияр
