Жаңалықтарды Telegram арнамыздан оқыңыз!Ресей Үндістаннан бір миллион жұмысшы алмақ. Себебі елде барлық салада маман тапшы. Көші-қон саясаты қатаңдатылған соң, Орталық Азия мемлекеттерінің азаматтарының дені елдеріне оралған.
Жұбанышбек Токобаев 10 жылдан бері Ресейде жұмыс істейді. Бұрын жұмысқа орналасу оңай болса, қазір еңбек патентін сатып алуға мәжбүр. Табысы елу пайызға азайыпты.
Жұбанышбек Токобаев, еңбек мигранты:
Бәрі қымбаттады. Ақшамның барлығын елге жіберетінмін. Қазір ондай мүмкіндік жоқ, пәтер жалдап тұрамын. Оның да құны өсті. Сондықтан өз еліме ораламын деп шештім.
Жыл сайын Ресейге он миллионға жуық еңбек мигранты келетін. Құрылыс, өңдеу өнеркәсібі, қоғамдық тамақтану, такси қызметінде жұмыс істейтіндердің 70 пайызы шетелдік. Елде инфляция шарықтап, айлық қысқарды. Сонымен қатар миграциялық талап қатаңдатылды. Шетелдік жұмысшыларға қатысты 16 заң шықты. Салдарынан еңбек мигранттарының 600 мың баласы мектепке қабылданбады. Сондықтан шетелдік жұмысшылар өз мемлекеттеріне кетуге мәжбүр. Орталық банктің мәліметінше, бүгінгі күні кәсіпорындардың 73 пайызында кадр дефицит.
Валерий Дугинов, кәсіпкер:
Кадр мәселесін шешуге тырысып жатырмыз. Өйткені маман табу өте қиын. Тіпті оқу орындарына шықтық, барлығын жұмысқа шақырып жатырмыз. Бірақ әзірге нәтиже жоқ.
Қазіргі таңда Ресейде жұмыс істейтін шетелдік жұмысшы саны 4 миллионға жетпейді. Сондықтан Үкімет Үндістан, Солтүстік Корея, Шри-Ланкадан жұмысшы тартпақ. 2030 жылға дейін кадр тапшылығы мәселесі шешілмейді, дейді мамандар.
Индира Бегайдар
