Жаңалықтарды Telegram арнамыздан оқыңыз!Қазақтың бағына біткен даңқты дирижер, өмірін өнерге арнаған дара тұлға Нұрғиса Тілендиев қазақ музыкасын 500-ден астам туындымен толықтырды. Соның ішінде халық арасына кең таралған шығармалары орталық концерт залының сахнасында шырқалды. Опера жұлдыздары мен дәстүрлі ән өнерінің майталмандары өнер көрсеткен кеш аншлагпен өтті.
Қасымхан Есімсейітов, қала тұрғыны:
Астанада бүгін үлкен мереке. Нұрекеңнің қазақ музыка өнеріндегі орны ерекше. Ондай тұлға 100 жылда 1-ақ рет туады ау. Нұрекеңнің «Отырар сазы» халық аспаптары оркестрін сонау 80 жылдары құрылған кезінен тыңдап, Алматыда концерттеріне баратынмын.
Әке жолын қуып, аманатын арқалаған Дінзухра Тілендиева концертте бой көрсетіп, «Отырар сазы» академиялық халық аспаптар оркестрінің ән шашуына жетекшілік етті.
Бұл 100 жылдығына біз көптен бері дайындалып келе жатырмыз. Бүгінгі концерт өте ерекше болады. Керемет әншілер әкемнің әйгілі әндерін орындайды. Құстар әні, Өз елім әндері бүкіл халыққа тараған, тіпті халық әндері болып кетті.
Жыл бойы Қазақстанның барлық өңірінде 100-ге жуық іс-шара, атап айтсақ, көрмелер, концерттер, байқаулар мен фестивальдер ұйымдастыру жоспарланған. Осы аптада өтетін кештерде бұрын соңды орындалмаған, композитордың архивінен алынған «Махаббат таңы» әні көрерменге алғаш рет ұсынылады.
Светлана Айтбаева, әнші:
Екінші сәуір күні өтетін концертте жаңа шығармасын орындаймын. Нұрғиса Тілендиевтің архивінен алып, 100 жылдыққа арнайы Дінзухра екеуміз ақылдаса отырып, оркестрге лайықтап, «Махаббат таңы» деген Тұман Молдағалиевтің сөзіне жазылған әдемі бір элегиялық стиліндегі әдемі бір әнін дайындаған болатынбыз. Бұйырса сол әнді де орындаймын.
Еліміздің еңбек сіңірген қайраткерлері, халықаралық байқаулардың лауреаттары мен жарық жұлдыздардың басын біріктірген ауқымды шарада Мемлекет басшысының атынан гүл шоқтары табыс етілді. Қазақ даласын күймен күмбірлеткен композитордың мерейтойына арналған концерттер алдағы бірнеше күн жалғасады.
Динара Жарқынбек
