Жаңалықтарды Telegram арнамыздан оқыңыз!Қазақстандық өнертапқыштардың жобалары халықаралық нарықта да сұранысқа ие. Себебі ІТ-платформаларды құрастырып, оған миллиондаған доллар инвестиция тартып, жобасын жүзеге асырып жатқан талантты жастарымыз көп. Сондай дарынды қазақ жастарының тағы бір стартабымен танысайық.
Ерсұлтан мен Әлібек АҚШ-та білім алған. Олар жарты жылдан бері ортақ ІТ-жобаларын жүзеге асырып жүр. Олар ойлап тапқан платформа ірі компанияларға консалтингтік қызмет көрсету жұмысын жасанды интеллектінің көмегімен жылдам әрі сапалы етіп атқаруға көмектеседі.
Ерсұлтан, ІТ-кәсіпкер;
Біздің жасап жатқан жоба Сиай деп аталады. Бұл платформа консалтингпен айналысатын кіші және орта бизнеске арналған қосымша, бағдарлама. Біз жасанды интеллектінің ең соңғы жаңалықтарын қолданып жасадық. Біздің клиенттер өздерінің клиенттеріне тезірек және жақсырақ коммерциялық ұсыныспен жауап бере алады.
Бұл қосымша компанияларға коммерциялық ұсынысты жүйелеп істеп береді. Мысалға, кемінде үш маман 20 сағаттан аса уақытта әзірлейтін құжатты бұл платформа арқылы өте жылдам дайындауға болады. Қосымша тәулігіне оннан аса қаржылық ұсыныс құжатын құрастырады.
ІТ саласында еңбек етіп жүрген қазақстандық кәсіпкерлер көрме-шарасын ұйымдастырған. Бұл тәжірибе алмасып, жаңа инвесторлар табуға таптырмас мүмкіндік.
Ерсұлтан, ІТ-кәсіпкер:
Жаңа адамдармен танысып, ой салыстырып, жаңа жасап жатқан компанияларымыз немесе бұрынғы жұмыстар туралы көбірек біліп, идея алмасып жатырмыз. Біз жаңа клиенттерді кездестіріп жатырмыз. Келесі кезеңде қаржыландыруды көтеретін инвесторлармен сөйлесіп жүрміз.
Жалпы, Қазақстандағы ІТ саласы мен жасанды интеллект негізінде стартаптардың дамуы – ел дамуының маңызды аспектілерінің бірі. Жасанды интеллект пен ІТ жобаларының табысы еліміздің экономикалық және әлеуметтік динамикасына оң әсерін тигізетіні сөзсіз.
Жалғас Cәдібекұлы
