Қостанай жастары ардагерлерге көмектесті

Қарттарға қамқорлық жасау адамзаттың қастерлі парызы. Қостанайда «Таза Қазақстан» жобасы аясында ерікті жастар ардагерлердің ауласының қарын күреп, жинақтап берді.

«Ардагерлерді ардақтайық» акциясы шеңберінде өткен бұл игі шараға «Аманат» партиясының жастар қанаты мұрындық болды. Олар сондай-ақ көп балалы ана, «Алтын алқа» иегері Бижан Құлдырайханның үй шаруасына көмек көрсетті. Осы жыл ішінде қарттарға қолғабыс ету шарасына 150-ден астам ерікті қатысқан.

Аружан Сәрсенбаева, «Жастар рухы» жастар қанатының төрағасы:

Осы жоба аясында бұл жыл ішінде біз 15-тен астам отбасыға, яғни ата-әжелерге көмектестік. Ол тек қана қар жинауға ғана байланысты емес, мысалы су тасқыны біткеннен кейін кейбір қарт адамдарда көмектесетін адамдары жақында болмады. Соларға біздің белсенділеріміз келіп, үйдегі жиһазды далаға шығарып, үй ішінде жинау жұмыстары жүргізіп, тұрғындарға өзінің көмегін тиізді.

Дәуренбек Әбдібек