Жаңалықтарды Telegram арнамыздан оқыңыз!«Қазақмыс» Балқашты сақтауға 5 млн доллар бөледі. Қомақты қаражат көлдің экожүйесін сақтауға бағытталмақ. Бұл туралы «Қазақмыс» компаниясының өкілі Бакуде өткен халықаралық конференцияда айтты. Мақсат - Балқаш көлін сақтап, келешек ұрпаққа жеткізу.
«Балқаш көлінің су ресурстарын басқару: Халықаралық ынтымақтастық, зерттеулер және қаржыландыру». Бакуде БҰҰ-ң климат өзгеруі жөніндегі халықаралық конференциясында «Қазақмыс» корпорациясы осындай тақырыпта диалогтық сессия өткізді. Халықаралық сарапшылар мен түрлі ұйым өкілдері бас қосқан кездесуде Балқаш көлін сақтаудың стратегиялық маңызы талқыланды.
Сәкен Шаяхметов, «Қазақмыс» корпорациясының тұрақты даму жөніндегі директоры:
«Қазақмыс» корпорациясы Балқаш көлінің экожүйесін сақтау үшін 5 млн доллар бөледі. Балқаш көлін сақтаудың стратегиялық маңызы зор. Бұл мәселе ұлттық әрі халықаралық деңгейде ерекше назарда болуы тиіс.
«Қазақмыс» корпорациясы Балқаш көлінің экожүйесін зерттеуге арналған ғылыми жобаларды дамытуға ниетті. Сондай-ақ аймақтың су ресурстарына тұрақты басқару тәсілдерін енгізуді қолдайды.
Сәкен Шаяхметов, «Қазақмыс» корпорациясының тұрақты даму жөніндегі директоры:
Балқаштың Арал теңізінің қайғылы тағдырын қайталауына жол бермеуіміз керек. Бұл көл миллиондаған адамның өмірі, аймақтың экономикасын және ел болашағын айқындайтын маңызды жобалар үшін шешуші мәнге ие. Біз осы мақсатқа жету үшін әлемдік қауымдастықпен күш-жігерімізді біріктіруге дайынбыз.
Балқашты сақтау – болашақ үшін маңызды. Қолға алынған бастамалар көлдің экожүйесін жақсартуға сеп болады деген үміт басым.
Самал Қабышева
