Жаңалықтарды Telegram арнамыздан оқыңыз!Маңғыстауда дауылды желдің салдарынан бірнеше ғимараттың шатыры ұшып, сауда үйі мен аурухананың қасбеті жұлынып түсті. Екі адам жарақат алды. Қабырғасы сынған тұрғын ауруханада жатыр. Әскери бөлімдердің бірінің шатыры ұшып, зардап шеккен сарбазға медициналық көмек көрсетілді. Қатты желдің салдарынан қаланың тең жартысында жарық өшті. Бағдаршамдар істемей, қатынас қиындады. Бірақ, көп ұзамай электр жарығы берілді. Қарақия ауданында мектептер онлайн оқуға көшті. Өңірде ертең де осындай дауыл болуы ықтимал дейді мамандар.
Оралда алғашқы қар жауып, көлік қозғалысы қиындады. Қоғамдық көліктер кестеден кешікті. Дөңгелек ауыстыру орталықтарында ұзын-сонар кезек. Коммуналдық кәсіпорындар күшейтілген жұмыс кестесіне көшті. Қар тазалауға 300-ге жуық жұмысшы мен 139 арнайы техника жұмылдырылды. Ең алдымен, көлік нөпірі көп магистральды көшелерді тазалауға басымдық беріледі.
Бекжан Тоқжанов, облыстық жолаушылар көлігі және автомобиль жолдары басқармасы басшысының орынбасары:
Автожолдарда қардан тазалау жұмыстары бірінші кезекте автокөліктер қарқынды жүретін жолдарда 2-4 сағат аралығында атқарылады. Барлық автомобиль жолын қардан тазалау жұмысы қар түскеннен кейін 24 сағат аралығында орындалады. Жергілікті маңызы бар жолдарды күтіп-ұстау жұмыстары бойынша барлығы 265 арнайы техника жұмыс жасайды.
Аягөз Оралбайқызы
Ардақ Мұратқызы
