Ұлытау облысында дәстүрлі «Көкмайса - 2024» этно-фестивалі өтті. 9-шы мәрте ұйымдастырылған шарада ұлттық ойындарымыз ұлықталды.
Бұл шараның ел арасындағы негізгі атауы - «Қымызмұрындық». Жер аяғы кеңіп, желіні толған биелердің желіге байланған уақыты. Жыл сайын дәстүрлі түрде өтетін Қымызмұрындық өңірдің асыға күтетін мерекесіне айналған. Биыл да 11 киіз үй тігіліп, жиналған жұртшылық түрлі ұлттық ойындарды тамашалады. Бұл жолы жүлде қоры- 4 000 000 теңге.
Бақтияр Қожахметов, «Ұлы тағзым» қоғамдық қорының директоры:
Қымыз мерекесі Кеңес дәуірінде де тойлана бастаған. Біз бірақ 2012 жылы фестиваль деңгейіне жеткіздік. Шетелден қонақтар шақырып, үлкен мерекеге айналдырдық. Біз оны Ұлытаумен шектемей ауқымын кеңейтіп жатырмыз. Қазақстанның түкпір- түкпірінде өтсін деген ниетіміз бар.
Дүбірлі доданың басты ерекшелігі - ұмытыла бастаған қолөнердің қолға алынғаны, зерек ұлттың зергерлік өнері қайта жаңғырғаны. Киіз басу, ши тоқу, арқан есу, қамшы өру, домбыра жасау және қымыз ашытудың үлгілері көрсетілді.
Ақжол Құрмансейіт, облыс әкімі аппараты басшысының орынбасары:
Барлық құндылықтарымызды көрсететін бұл фестиваль жалпы халықтың қолдауымен сүйіспеншілігіне айналған. Себебі Ұлытау ауданы көлеміндегі мерекесін ЮНЕСКО-ның материалдық емес құндылықтар қатарына қосқаны белгілі.
Қайта жаңғырып келе жатқан мереке бүгінде Ақмола, Павлодар облыстарымен, Қарағанды қаласында да аталып өтті. Жылдан жылға ауқымы кеңейіп, ұмыт болған ұлт құндылықтары елге дәріптелді.
Жандос Бақытұлы
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Ұлытау облысында «Көкмайса - 2024» этно-фестивалі өтті&mh_tags=Qazaqstan&mh_page=https://qazaqstan.tv/index.php/news/196442/)