Жаңалықтарды Telegram арнамыздан оқыңыз!
Алматыда Мемлекет басшысы Дүниежүзілік сауда ұйымының бас директоры Нгози Оконджо-Ивеаламен кездесті. Қасым-Жомарт Тоқаев Қазақстан халықаралық ұйыммен ынтымақтастықты кеңейтуге айрықша мән беретінін атап өтті. Қазіргі кезде біз әлемнің 180 елімен сауда-саттық жасаймыз. Президент соңғы үш жылда еліміздің сыртқы саудасы 53 пайызға ұлғайып, 160 миллиард долларға жеткенін айтты. Сонымен қатар жуырда экономиканы ырықтандыру жөніндегі жарлыққа қол қойылды. Бұл құжат әділ бәсекені күшейтуге, кәсіпкерлік еркіндікті сақтауға және мемлекеттің экономикадағы үлесін азайтуға бағытталған деді. Өз кезегінде бас директор ұйымға мүше елдер министрлерінің 12-ші конференциясының төрағасы ретінде халықаралық сауда саласындағы маңызды шешімдерді қабылдауға Қазақстанның қосқан үлесін жоғары бағалады.
Қасым-Жомарт Тоқаев, Қазақстан Республикасының Президенті:Сіздің Алматыға сапарыңыздың маңызы зор. Осы мүмкіндікті пайдалана отырып, тығыз ынтымақтастығымыз үшін өзіңізге ризашылығымды білдіргім келеді. Ұйымға мүше елдер министрлерінің 12-ші конференциясына төрағалық ету – Қазақстан үшін үлкен жауапкершілік әрі мәртебе. Аталған жиын барысында ДСҰ мүшелері ұйымды реформалау туралы маңызды шешімдер қабылдай алды.
Шерхан Жамбылұлы
