Жаңалықтарды Telegram арнамыздан оқыңыз!Төл ойынымыз тоғызқұмалаққа төрткүл дүние тәнті. Қыркүйекте өтетін 5-ші Дүниежүзілік көшпенділер ойынына латвиялық тоғызқұмалақ шеберлері де қатысуға ниетті. Дүбірлі додаға дайындалып жатқан еуропалық спортшылармен әріптесім Қаракөз Тұрмағанбет cөйлесті.
Карина мен Дмитрийс – 2022 жылы Түркияда өткен Дүниежүзілік көшпенділер ойынының қола жүлдегерлері. Бірі болашақ сәулетші болса, екіншісі – авиациялық механиктің оқуын оқып жүрген студент. Тоғызқұмалаққа деген қызығушылық бірнеше жыл бұрын оянған. Әу баста логиканы дамыту мақсатында қолға алған ойынмен бүгінде кәсіби түрде айналысады.
Карина Алексейева, IV Дүниежүзілік көшпенділер ойынының тоғызқұмалақтан қола жүлдегері:
2016 жылдан бастап ойнап келемін. Тоғызқұмалақтың арқасында әрбір қадамды алдын ала ойластыру, іс-әрекетті жоспарлау дағдысы қалыптасты. Қазір Дмитрийс екеуіміз 5-ші Дүниежүзілік көшпенділер ойынына дайындалып жүрміз.
Дмитрийс Лапинс, IV Дүниежүзілік көшпенділер ойынының тоғызқұмалақтан қола жүлдегері:
Тоғызқұмалақ ойнағалы бері зейін жақсарып, байқампаз бола бастадым. Бұл қасиет ойын барысындағы жұп пен тақ санға мән беруден қалыптасты. Кейін ақша есептеу, оңтайлы жұмсау, қаржылық сауатымның артуына әсер еткенін байқадым.
«Төрт мың жылдық тарихы бар зияткерлік ойын сондай-ақ қарсыласты құрметтеуге және ұқыптылыққа баулиды», - дейді Латвиядағы Тоғызқұмалақ федерациясының басшысы Любовь Азимова.
Любовь Азимова, Латвиядағы тоғызқұмалақ федерациясының басшысы:
Тоғызқұмалақ еуропалықтар ойнап үйреніп қалған үстел ойындарымен салыстырғанда мүлде өзгеше. Өйткені мұнда домалақ ұсақ тасты қолға алып, моторикамен жұмыс істейсіз. Соның арқасында саусақ ұшындағы сезімталдық артады. Тасты мұқият есептеп, орын-орнына ұқыптап қоясыз. Шахмат не дойбыда ондай жоқ.
Любовь Азимова тоғызқұмалақпен 2018 жылы интернет арқылы танысқан. Көшпенділердің ежелгі ойынына тәнті болғаны соншалық, дереу зияткерлік үстел ойындары клубының балаларға арналған бағдарламасына енгізеді. Еуропа жұртшылығына кеңінен насихаттау мақсатында ойын туралы оқу құралын басып шығаруды ұйғарады. Кітапты құрастыруға тоғызқұмалақтан әлемнің екі дүркін чемпионы Лина Каримова көмектеседі. Екі жыл бұрын жарыққа шыққан «Тоғызқұмалақ негіздері» атты кітап тапсырмалармен қоса, қазақ мәдениетімен таныстыратын материалдармен қамтылған.
Лина Каримова, тоғызқұмалақтан әлемнің екі дүркін чемпионы:
Латвиядағы тоғызқұмалақтың қарыштап дамуына ықпал етіп жатқан жайттың бірі осы кітап деп білеміз. Себебі тоғызқұмалақ туралы орысша мәлімет жоқтың қасы. Сапалы оқулық шығу үшін барымызды салдық. Үш жыл уақытымызды жұмсадық. Алдағы уақытта ағылшын тіліне аударуды жоспарлап отырмыз.
Себебі Еуропада ағылшын тілінің аясы кең. Өскелең ұрпақ та өз тілімен қатар ағылшынды жетік меңгерген. Ал баланың дамуына үлкен үлес қосар зияткерлік ойынды насихаттау маңызды деп біледі Балтық еліндегі тоғызқұмалақ федерациясының басшысы.
Қаракөз Тұрмағанбет
