Жаңалықтарды Telegram арнамыздан оқыңыз!Талдықорғанда қаржы жымқырды деген күдікпен білім саласының 23 қызметкері қылмыстық жауапкершілікке тартылуда. 9 адам сот санкциясымен қамауға алынды. Олардың басым бөлігі мектеп есепшілері және білім бөлімінің мамандары. Сыбайлас жемқорлыққа қарсы қызмет департаментінің мәліметінше,бухгалтерлер жүйелі түрде аса ірі көлемде ақша ұрлаған.
Қуаныш Қанатұлы, тілші:
Талдықорғанда мемлекет қаржысын жымқырды деген күдікке ілінген мектептердің бірі Николай Островский атындағы номері сегізінші орта мектеп. Бұл жерде құзырлы органдардың мәліметінше 662 млн теңге қаржы қолды болған. Ең қызығы мұндағы мұғалімдер өздерінің есебінен басқа біреудің пайда тауып жатқанын мүлдем білмеген.
Әсел Рашидова, тарих пәнінің мұғалімі:
Біз естіген кезде өзіміз де таң қалдық. Бірақ жаңағы есепші тарапынан бізде ешқандай қиындықтар болған жоқ. Ай сайын біздің уақытылы жалақымыз түсіп отырды.
Қалада жиырмаға жуық білім шаңырағының бухгалтерлері бір жүйемен қаржы жымқырып отырған. Кейбірі мектепке мүлдем қатысы жоқ адамдарды тіркеп жалақысын аударып отырса, енді бірінде ұстаздардың үстемақысы қолды болған.
Гүлмира Ахметова, Жетісу облыстық білім басқарма басшысының орынбасары:
Тергеу жұмыстары аяқталғанға дейін нақты ешқандай шешім айта алмаймыз. Бірақ бүгінгі күнге дейін Талдықорған қаласы бойынша 9 мектептің директоры өз еркімен жұмыстан босады. Қазіргі кезде заңнамаға сәйкес ол мектептерге мектеп директорлары конкурстық негізде тағайындалды.
Тергеу жұмыстары әлі жалғасып жатыр. Істі болғандардың мүлкі тәркіленсе, кейбір азаматтар ұрланған қаржыны қайтаруға кіріскен.
Дулат Мадияров, Жетісу облысы бойынша сыбайлас жемқорлыққа қарсы күрес департаменті басшысының міндетін атқарушы:
Келтірілген залалды өтеу үшін іс кезінде 31 жылжымайтын мүлік, 14 автокөлік, зергерлік бұйымдар және ақша-қаражаттарына тыйым салынды. Сонымен қоса, күдіктілердің өзі еркін түрде келтірілген залалды өтеу жұмыстары жүргізілуде. Оның барлық сомасы 3 млрд теңгеден астам ақша болып келеді.
Бұған дейін Қалалық білім бөлімінің жетекшісі мен бас есепшісі істі болып, қамалған тұғын. Тергеу әлі жүріп жатыр. Жалпы үш жылда Талдықорған қаласы бойынша 4,6 млрд теңге мемлекет қаржысы жымқырылған.
Қуаныш Қанатұлы
