Жаңалықтарды Telegram арнамыздан оқыңыз!Ресейде Абай шығармаларын аудару ісі жалғаспақ. Ұлы ойшылдың шығармаларына қызыққан жастар Абай оқуларын дәстүрлі түрде өткізіп тұру керек дейді. Бірнеше өңірде ұлы ақынға арнап шаралар да өткізілмек.
Мәскеудің қақ ортасында Абай Құнанбайұлына арналған ескерткіш бар. Ол 2006 жылы тұрғызылған. Оның өсиеттері өскелең ұрпақ үшін адамгершілік бағдар ретінде қызмет етеді. Ал жастар ұлы философтың әр сөзі өнегеге толы екенін айтады.
Назерке Ерғазы, жас маман:
Біз осы елшіліктің алдында, Абай Құнанбайұлының ескерткішінің алдында студенттер болып, қазақ жастары, қазақстандық студенттер барлығымыз жолығып, кездесіп тұрамыз. Біздің кездесу орнымыз осы Абай Құнанбаевтың ескерткіш алаңы. Жалпы Абайдың «Әсемпаз болма әрнеге» өлеңіндегі өлең жолдары мен үшін ұран іспеттес болып кетті.
Қазақстанның Ресейдегі елшісі Дәурен Абаев атап өткендей, Абай шығармашылығының арқасында Пушкин, Лермонтов, Гете, Байрон, Шиллер және әлемдік мәдениеттің басқа да өкілдерінің туындылары қазақ тілінде сөйледі. Бүгінде өзге ұлт өкілдерінің ақынға құрметі ерекше.
Александр Фрайденберг, студент:
Маған Абайдың қара сөздері ұнайды. 37 сөз. «Дүние - үлкен көл, заман - соққан жел. Алдыңғы толқын - ағалар, артқы толқын – інілер. Кезекпенен өлінер, баяғыдай көрінер».
Мәскеудегі қазақ диаспорасының өкілдері мен жергілікті жоғары оқу орындарының студенттері «Абай оқуларына» қатысты, сондай-ақ «Желсіз түнде жарық ай» әнін шырқады, ойшылдың шығармашылығы туралы викториналық сұрақтарға жауап берді. Жеңімпаздар естелік сыйлықтар алды.
Индира Бегайдар
