Жаңалықтарды Telegram арнамыздан оқыңыз!Бір-бірін түсіну үшін адамға кейде бір тілде сөйлесудің қажеті жоқ. Жүрекпен жеткізуге болады. Қытайлық журналист Қазақстаннан алған әсерін осылай жеткізді. Ван Гуань Мемлекет басшысымен сұхбат жазу үшін жақында Астанаға келіп кеткен еді. Елордада болған қызық жағдайды біздің арнаға айтып берді.
«Астана – тым суық, бірақ, адамдарының пейілі ыстық». Ван Гуань әңгімесін осылай бастады. Ол көктемде Мемлекет басшысынан сұхбат жазу үшін келген еді.
Ван Гуань, Қытай медиакорпорациясының журналисі:
Астанаға алғаш рет бардым. Бұрын Алматыға жолшыбай соққаным болмаса, жалпы Қазақстанға бірінші сапар. Онда адамдардан жылулық көрдім. Қызық жағдайды айтып берейін. Өзіммен алып келген костюмді бүлдіріп алдым. Жаңасын алу үшін жақын маңдағы дүкенге жүгірдім. Онда мүлде танымайтын бір жігіт маған үлкен көмек көрсетті. Ағылшын тілін жөнді білмейді екен, бірақ ол да кедергі болмады. Аударма арқылы түсіністік. Содан бері жақын дос болып кеттік. Әлі күнге дейін әлеуметтік желі арқылы хабарласып тұрамыз. Міне көрсетейін.
Шыңғыс Жылқайдаров, Астана қаласының тұрғыны:
Ол ағылшынша сөйледі. Мен бар білгенімді айтып, аудармаға да жүгіндім. Жақын тіл табысып кеттік. Вань қатты асығыс болды. Маңызды кездесуі барын айтты. Тоқаевпен кездесуім бар деп түсіндірді. Содан костюм тауып, шалбарының балағын қысқартып, қазақы дархан көңілмен шығарып салдық қой. Бірақ, әлі күнге интернет арқылы ыммен ұғынысып келеміз.
Ван Гуань осыған дейін 20 елдің басшысымен сұхбат жүргізген. Бірақ, шетелдік көшбасшылардың арасында қытай тілінде сөйлеген тек Тоқаев деді. Ауызекі емес, кәсіби түрде тілдескен. Ал қытай иероглифтерін игеру оңай шаруа емес.
Ван Гуань, Қытай медиакорпорациясының журналисі:
Сұхбат жазу уақытын күндіз 2.30-ға белгілегенбіз. Тура уақытында келді. Мұндай жағдай өте сирек. Әдетте спикерді ұзақ күтемін. Сұхбат аяқталысымен бірінші сұрағы: «Мен қытайша көптен бері сөйлеген жоқпын. Ұмытып қалыппын»,-деді. Ал шын мәнісінде мен қытай азаматы ретінде оның тілді меңгеру деңгейіне қатты таң қалдым. Әрі өзіне тым талапшыл екенін байқадым.
Қасым-Жомарт Тоқаев сұхбатта ел тұтастығы мен қауіпсіздігіне көп тоқталғанын айтты журналист. Аумақты қорғауда өте жігерлі көрінді, деді. Ал қытайлық журналист Қазақстанның табиғатына ерекше тоқталды, сөз соңында отбасымен келіп демалатынын айтты.
Асима Нұрбайқызы
