Жаңалықтарды Telegram арнамыздан оқыңыз!Түркістан облысы Төлеби ауданындағы Кеңесарық ауылында орта мектептің астынан жерасты суы көтеріліп, жертөлесі суға толып кеткен. Ғимараттың астын судан тазартқанымен, іргетасы үгіле бастаған. Білім ошағында 300-ден аса бала оқиды.
Жауаптылар суды сору үшін мектептің жанын түгел қазып тастаған. Содан бері ашық-шашық күйі жатыр. Терең шұңқырға ойын баласы түсіп кетеді деп қауіптенген ұстаздар енді кезектесіп күзетуге мәжбүр. Мектеп директоры болса, терең шұңқырды жабуға 5 млн теңгедей қаражат керек дейді. Ал әкімдіктегілер қаражатты білім беру басқарма бөлу керек екенін айтады.
Нұрлан Жүнісбеков, Б.Биболатұлы орта мектебінің директоры:
Төтенше жағдайларға хабар бердік. Төтенше жағдайлар келді, анықтады судың қайдан шығып жатқанын. Қаражат бөлінсе, ол менің қолымда емес. Қаражат бөлінсе жөнделеді.
Тұрар Шыңғысбай, Төлеби аудандық әкімдігінің баспасөз хатшысы:
Мектептің жанындағы қашыртқыға дренаж жасалып, қайтадан жабылуы керек. Өйткені дренаж жасалмаса, қайта су кіру қаупі бар. Бұл жұмыстар мектеп тарапынан істелінеді.
Айнұр Ақбаева
