Жаңалықтарды Telegram арнамыздан оқыңыз!«Азық-түлік дағдарысы гуманитарлық апатқа әкеп соғуы мүмкін». БҰҰ азық-түлік бағдарламасының басшылығы жаһан жұртын дағдарыспен күресте күш біріктіруге шақыруда.
Ұйымның мәліметінше, қазір әлемде 900 млн астам адам аштықтың зардабын тартып отыр. Бір тілім нанға зәру жандарға қол ұшын созу үшін әлемдік қауымдастық Брюссельде «Көмек» көрмесін ұйымдастырды.
Африкалық 1,5 жасар Наомидің салмағы бар-жоғы алты келі. Аштықтың кесірінен Сомали, Нигерия мен Суданда қазір 5 жасқа дейінгі 20 млн бала өлім аузында жатыр. Ашрафи жаһан жұртынан көмек сұрау үшін Брюссельдегі көрмеге арнайы келіпті.
Ашрафи Бенуджи, «Африкаға көмек» ұйымының жетекшісі:
Жазда су болмай, аймағымызда егін шықпады. Соғыстың кесірінен Украинаның бидайы бізге жетпей жатыр. Аштықтан биыл өлкемізде 250 мың адам қайтыс болды.
БҰҰ мәліметінше, қазір әлемнің 48 елінде 924 млн адам аштықтың зардабын тартып отыр. Дені Африка, Оңтүстік Азия мен Латын Америкасының халқы. Брюссельдегі көрмеде донор мемлекеттер көмекке мұқтаж жандарға жіберетін азық-түлік, дәрі-дәрмектерін сөреге шығарды.
Айдын Дурмуш, Гуманитарлық көмек қорының бас директоры:
Кикілжіңдер, климаттың өзгеруі, жаппай қымбатшылық азық-түлік қауіпсіздігіне қауіп төндіріп тұр. Халықаралық қауымдастық күш біріктіріп, мұқтаж елдерге бар көмекті жіберуі тиіс. Үміт АҚШ пен Батыс елдерінде.
Нұрсұлу Қасым, тілші:
Қарт құрлықта да биыл жағдай мәз емес. Шілдедегі қуаңшылықтан егін күйіп кетті. Украина мен Ресейдің тыңайтқыштары бұрынғыдан екі есеге қымбаттады. Азоттық тыңайтқыштарды еуропалықтар өздері өндірейін десе, электроэнергияның бағасы аспандап тұр.
Бұл дағдарыс Еуропа елдерінде жеміс-жидек, көкөніс, азық-түлік құнының шарықтауына әкеп соқты. «Шығынға шаш етектен баттық»-деген шаруалар қазір өзге түгілі өз нарығын қажетті азық-түлікпен қамтуға қауқарсыз.
Соғыс тоқтамаса, әлемде аштықтан қырылатындардың, кедейлердің саны көбейеді. Халықтың наразылығы күшейетін болса, жаһандық бейбітшілікке қауіп төнеді,-дейді сарапшылар.
Нұрсұлу Қасым
