Жаңалықтарды Telegram арнамыздан оқыңыз!Шымкентте қатерлі ісікті ерте сатысында анықтайтын позитронды-эмиссиялық томография орталығы ашылды. Мұндағы жоғары технологиялық медициналық құралдардың көмегімен енді онкологиялық және бас-ми ауруларына дәл диагностика жасалады.
Ядролық медицина орталығындағы позитронды-эмиссиялық томографияның көмегімен обыр ауруының ошағын дәл тауып, емдік шараларды дер кезінде бастауға мүмкіндік туды. Соның арқасында жылына орташа есеппен онкологиялық сырқатқа шалдыққан 5 мың адамның ауруын ерте сатысында анықтап, өлім-жітім едәуір азаймақ. Сондай-ақ, орталықта жаңа қондырығының көмегімен сәулелік терапия жүргізіледі.
Дәулет Ержанов, Медициналық орталықтың директоры:
Сәулелік үдеткіш бізге сәулелік терапия жүргізуге мүмкіндік береді. Бұрынғыдай хирургиялық әдіспен емес, 2 миллиметрден басталатын ісік ауруларын емдеуге мүмкіндік береді.
Дәрігерлер қондырғылардың көмегімен күніне 30 адамның денсаулығын тексеріп шыға алады. Онкологиялық аурухана жанынан ситуациялық орталық та ашылды. Осындай диагностика үшін шымкенттіктер 2-3 ай кезек күтіп, Астана, Алматы қалаларына баруға мәжбүр еді.
Нұрлыбек Асылов, Шымкент қаласы денсаулық сақтау басқармасының басшысы:
Адам өмірі 47 жастың төңірегінде болатын, қазіргі жетістігіміз 52-ден аса өмір сүріп жатыр ауырғандар.
Медициналық орталық мемлекеттік-жекеменшік әріптестік аясында ашылды. Енді радиофармпрепараттардың кеңейтілген желісін іске қосу көзделіп отыр. Сондай-ақ, жоғары дәлдіктегі радионуклидтік диагностика орталығы құрылады. Ядролық медицина мегаполисте медициналық туризмді жетілдіруге негіз болмақ.
Ғани Қалмаханов
