Жаңалықтарды Telegram арнамыздан оқыңыз!Ұлыбританияда ұлттық валюта айтарлықтай әлсіреп, соңғы 40 жылда болмаған көрсеткішке түсті. Бұл жағдай бизнес өкілдерінің де, қарапайым халықтың да алаңдаушылығын туғызып отыр.
Марина Бекенова, тілші:
Бұған басты себеп ел билігінің салықты төмендету туралы мәлімдемесі. Жақында ғана сайланған жаңа үкімет байшыкештердің жалақысына салынатын табыс салығын 5 пайызға азайтқаны белгілі. Нәтижесінде мемлекет қазынасы жылына 2 млрд фунт стерлингтен қағылайын деп отыр. Ал оның орнын сырттан қарыз алып толтырмақ. Мұны естіген халықаралық инвесторлар алаңдаушылық білдірген соң фунт күрт әлсіреп кетті.
Джейн Фоули, қаржы сарапшысы:
Егер валюта одан сайын әлсірей түссе, инфляция күшейеді. Өйткені энергия сияқты тауарларды шетелден импорттаймыз. Нәтижесінде электр қуатының бағасы шарықтамақ. Жарықтан бөлек жанар-жағар май және азық-түлік өнімдерінің де құны аспандайды.
Марина Бекенова, тілші:
Англия Банкі тығырықтан шығу үшін проценттік мөлшерлемені шұғыл көтеруі мүмкін. Бұл банкте депозиті барлар үшін тиімді — пайдасы еселене түседі және халықты банкте ақша ұстауға ынталандырады. Нәтижесінде фунт нығая бастайды. Бірақ ипотекалық несие алғандарға қиын — проценттік мөлшерлеме артып, бұрынғыдан да көп ақша төлеуге мәжбүр болады.
Марина Бекенова
