Жаңалықтарды Telegram арнамыздан оқыңыз!Өткен аптада ғана Федералды тергеу бюросы үйін тінтіген Дональд Трампқа енді Нью-Иорктың бас прокуроры шүйлікті. Прокурор үш жыл бойы тергеу жүргізіп, АҚШ-тың экс-президентін тергеуге арнайы шақыртқан. Қонақ үйлер, гольф алаңдары мен басқа да жылжымайтын мүліктерге иелік ететін Трамп компаниясы арзан несие алып, салықтан жалтару үшін банктер мен салық органына жалған қаржылық есеп берген деген айып тағы отыр. Азаматтық сот ісі аясында бұрынғы президенттен жауап алмақ болып, бірнеше сағат бойы сұрақтар қойған. Алайда Конституцияға енгізілген бесінші түзетуді алға тартқан Трамп жауап беруден бас тартты. Бұл әрекеттің экс президент үшін кері әсері болуы мүмкін. Сот кезінде алқа билер оның үнсіздігін ескеруі мүмкін дейді мамандар. Саяси оппоненттері де 2024 жылы тағы да президенттік сайлауға түсуді көздеп жүрген Трамптың өзіне қарсы қолданары анық. Осы іс барысында экс президенттің қызы мен ұлы да тергеуге тартылған.
Жалғас Сәдібекұлы
