Жаңалықтарды Telegram арнамыздан оқыңыз!Ертең ұлттық арнада «big drama show». Әлем назары Жапонияның Сайтама қаласындағы шаршы алаңға аумақ. Бокс жанкүйерлері жерлесіміз Генадий Головкин мен Риота Муратаның жекпе-жегін тамашалайды. Күн шығыс елінде өтетін бокс кешін «Qazaqstan» және «Qazsport» телеарналары тікелей эфирде көрсетеді.
Генадий Головкин мен Риота Мурата бүгін салмақ өлшеді. Екі боксшының салмағы шамалас. Бүгін 40-қа толған жерлесіміз әлі бабында. Ертең ел үмітін ақтайды дегенге сенім мол.
Серік Сәпиев, бокстан олимпиада чемпионы:
Мен өзім Жапония боксшысын жақсы білемін. Себебі ол Лондон Олимпиадасында алтын алған. Жақсы боксшы. Жапония боксшысының мықты тәсілі – ол төзімділік, болды. Қалған техника, тактиканың бәрі Головкинде жоғары. Головкин ұтады деп сенімдімін.
Ертеңгі жекпе-жек өткен жылдың желтоқсан айында өтуі тиіс болған. Бірақ, коронавирус панедемиясына байланысты кейінге қалдырылған. Спорт сүйер қауым бұл кездесу нағыз биг драма шоу болады деп отыр.
Олжас Байбосынов, спорт комментаторы:
Головкиннің рингке шықпағалы 1,5 жылдай болды. Қарсыласы да 2,5 жылдай ринке шыққан жоқ. Ұзақ үзіліс мүмкін әсер ететін шығар екі боксшыға да. Жапонияда өтіп жатқандықтан жекпе-жек, Головкин айқын басымдықпен жеңбесе, мүмкін төрешілер бүйрегі жапон боксшысына бұрылып кетуі мүмкін. Сондықтан, Головкин мерзімінен бұрын аяқтайды деп сенеміз.
Жапонияның Сайтама қаласындағы бокс кеші Қазақстан уақыты бойынша 15.00-де басталады. Головкин мен Муратаның жекпе-жегі 12 раундтан тұрады. Қос былғары қолғап шебері IBF және IBO тұжырымдары бойынша әлем титулдары мен WBA Super белбеуін сарапқа салады. «Qazaqstan» және «Qazsport» телеарналары тікелей эфирде көрсетеді. Сондай-ақ, qazaqstantv және qazsporttv сайты мен мобильді қосымша арқылы көруге болады.
Берік Көшербай
