Жаңалықтарды Telegram арнамыздан оқыңыз!
Еліміздің батыс өңірі: Ақтөбе, Атырау, Батыс Қазақстан, Маңғыстау облыстарының алдағы 5 жылда әлеуметтік-экономикалық дамуына 15,3 трлн теңге жұмсалмақ. Маңғыстауда кешенді жоспар аясында 226 жобаны жүзеге асыру көзделген.
Оған 2 триллионнан астам теңге жұмсалмақ. Бұл қаржының 62 пайызы жеке инвесторлардың үлесінде. Кешенді жоспарда, ең алдымен, өңірдің инфрақұрылымын дамытуға көңіл бөлінеді. Аймақтағы ең маңызды мәселе – ауызсу тапшылығын жою үшін, жалпы су тұщыту қуаты 260 000 текше метрді құрайтын 9 жоба жүзеге аспақ.
Нұрәділ Иманғалиев, облыстық Инвестициялар және туризмді дамыту басқармасы басшысының орынбасары:
Өз кезегінде туризм бөлімі 24 іс-шараны қамтиды. Сомасы 200 млрдқа жуық теңге. Көбінесе 90 пайызы жеке инвестиция есебінен. Жұмыс орындары ашылады. Жаңа туристік нысандардың көбеюін қамтамасыз етеді. Жалпы басқа экономиканың әртүрлі салаларын аралас дамытуға үлес береді.
Әлеуметтік жобалар жүзеге асады
Ал Ақтөбе облысында 18 ауылда денсаулық сақтау нысандары салынады. 224 мектеп жаңғыртылып, 16 орталық бой көтереді. Сонымен қатар, Ақтөбе қаласында колледж студенттері үшін 2 жатақхана салу көзделген. Ал өнеркәсіп саласында титан-цирконий кендерін қайта өңдейтін тау-кен байыту кешені салынбақ. Сонымен қатар, шетелдік инвесторларды тарта отырып, ерекше индустриялық аймақ құрылады. Бөлінген қаржы есебінен «Бұхара-Орал» магистральдық газ құбырының 3-желісі аяқталып, 85 ауылға көгілдір отын тарту көзделген.
Ғалым Мүсіров, экономика ғылымдарының кандидаты:
Ақтөбеде цемент зауытын салу қарастырылған екен. Бұл өте қажет. Өйткені Ақтөбе - болашақ мегаполис. Өнеркәсіп дамымай, экономика көтерілмейді.
Аягөз Оралбайқызы
