Жаңалықтарды Telegram арнамыздан оқыңыз!ҚР Ақпарат және қоғамдық даму министрлігінің қолдауымен «Қазақстан» телерадиокорпорациясы ұйымдастырған «30 жыл 30 есім» ұлттық байқауының жеңімпаздары анықталды. Телевизиялық жүлде Тәуелсіздіктің 30 жылдығына орай соңғы 30 жылда әр салада жетістікке жеткен бірегей тұлғаларға табысталды.
Байқау ережесі бойынша сарапшылардан құралған арнайы комиссия іріктеуімен еліміздің ғылым, білім, денсаулық сақтау, ауыл шаруашылығы, мәдениет, спорт, кино, дәстүрлі өнер сияқты 10 салада табысты еңбек етіп келе жатқан кәсіби мамандар таңдалды. Комиссия шешімімен екінші кезеңге өткен үміткерлер «Қазақстан» телерадиокорпорациясының www.qazaqstan.tv ресми сайтында жүргізілген жалпыхалықтық дауыс беруге қатысты.
Байқау қорытындысы бойынша 10 аталымда үздік шыққандар:
«Медицина және денсаулық сақтау саласына қосқан үлесі үшін» - медицина ғылымдарының докторы, академик Серік Ақшолақов, елімізде тұңғыш рет қан айналымының қосалқы құрылғыларын имплантациялау, донорлық жүректі және өкпені трансплантациялау сияқты бірқатар күрделі оталарды сәтті жүзеге асырған халықаралық дәрежедегі кардиохирург Юрий Пя, жоғары санатты дәрігер, «Алтын дәрігер» төсбелгісінің иегері Надежда Петухова;
«Қоғамдық белсенділігі үшін» аталымы бойынша тіл жанашыры Асылы Осман, еліміздегі ең танымал lider.kz еріктілер қозғалысының негізін салушы Олеся Баимова, адвокат, «Халық үні» жобасының авторы Айман Омарова;
«Мәдениет саласына сіңірген еңбегі үшін» әнші Димаш Құдайберген, күйші Секен Тұрысбеков, суретші Ерболат Төлепбай;
«Кино саласына сіңірген еңбегі үшін» театр және кино актері Болат Әбділманов, актер, Қазақстанның Халық әртісі Асанәлі Әшімов, театр және кино сахнасында 200-ден аса рөл ромдаған актер Досхан Жолжақсынов;
«Спорт саласындағы жетістіктері үшін» грек-рим күресінен Сеул Олимпиадасының күміс жүлдегері, Әлем чемпионы, Қазақстанның еңбек сіңірген жаттықтырушысы Дәулет Тұрлыханов, кәсіпқой боксшы, Бейжің Олимпиадасының, Азия ойындарының қола жүлдегері Қанат Ислам, ауыр салмақта әлемдік рекордты жаңартқан зілтемірші, төрт дүркін Әлем чемпионы Илья Ильин;
«Ғылымның дамуына қосқан үлесі үшін» аталымы бойынша математик, ҚР Ұлттық ғылым академиясының академигі Асқар Жұмаділдаев, «QazVac» вакцинасын жасаушы ғалым Күнсұлу Закарья, «Аралтөбе», «Берел» қорымдарынан «Алтын адамды» тапқан археолог Зейнолла Самашев;
«Білім саласының дамуына қосқан үлесі үшін» дарынды балаларға арналған «Білім-Инновация» мектебінің мұғалімі Муаммер Гүл, «Qazbilim» қосымша білім беру орталығының директоры Аятжан Ахметжанұлы, Қазақстанның тұңғыш Еңбек ері, математика пәнінің мұғалімі Аягүл Миразова;
«Ауыл шаруашылығы және агроөндіріс саласына қосқан үлесі үшін» аталымында асыл тұқымды қой өсіруші жас кәсіпкер Нұрислам Ыбраев, Еңбек ері, «Родина» агрофирмасының негізін қалаушы Иван Сауэр, еліміздегі түйе шаруашылығының дамуына атсалысып жүрген кәсіпкер, консервантсыз шұбат өндіруші компанияның иегері Сыдық Дәулетов;
«Дәстүрлі өнердің дамуына қосқан үлесі үшін» күйші Айгүл Үлкенбаева, әнші Рамазан Стамғазиев, жыршы Елмұра Жаңабергенова;
«Әдебиет» аталымы бойынша жазушы-драматург Дулат Исабеков, ақын Светқали Нұржан, ақын Ұлықбек Есдәулет марапатталды.
Үздіктердің есімі 2021 жылғы 23-30 қараша аралығында qazaqstan.tv сайты арқылы жүргізілген дауыс беру кезеңінде анықталды.
«30 жыл 30 есім» есім байқауының жеңімпаздары – халықтың таңдауы. Ұлттық арнаның ресми сайты арқылы дауыс беруге бір аптаның ішінде 962 858 қазақстандық қатысты. Ұлттық жүлде иегерлерін анықтауға атсалысқан ел тұрғындарына алғыс білдіреміз», - деді байқау жеңімпаздарын марапаттау шарасында «Қазақстан» РТРК» АҚ Басқарма төрайымы Ләззат Танысбай.
Жеңімпаздарды марапаттау рәсімінің телевизиялық нұсқасы «Qazaqstan» телеарнасынан 16 желтоқсанда эфирге шығады.
