Жаңалықтарды Telegram арнамыздан оқыңыз!Израиль Хамас қозғалысының 9 командирінің үйі мен 15 шақырым туннелді және Ислам жиһады ұйымы қолбасшыларының бірі Хуссам Әбу Харбидті жойды. Ал, өткен дүйсенбіден бері Газа секторында Израильдің авиациялық соққысынан қаза тапқандар саны 200-ге жетіп отыр. Солардың 58-і – бала. Талай ғимарат жермен-жексен болған. Палестиналық қарулы топтар болса, Израиль қалаларына 3 мыңнан астам зымыран жіберіп, 10 шақты тұрғынды мерт қылды. Палестина әкімшілігі кешегі күнді қанды жексенбі деп атап отыр. Себебі, өткен тәулікте Газада Израильдің шабуылынан 42 адам опат болды. Құрбандардың арасында 16 әйел мен 10 бала бар.
Секторда Израильдің соққысынан Associated Press агенттігі мен Al Jazeera тәрізді халықаралық медиа ұйымдардың өкілдіктері орналасқан ғимарат опырылып түсті. Таяу Шығыстағы соғыс өртінің өршуіне байланысты Біріккен Ұлттар Ұйымының Қауіпсіздік кеңесінде кездесу өтті.
Антониу Гутерриш, БҰҰ бас хатшысы:
Біз бүгін Газа мен Израильде соңғы жылдардағы ең ауыр шиеленіскен жағдайға куә болып отырмыз. Қазіргі әскери іс-қимылдар өте қорқынышты. Бұл зорлық-зомбылық, өлімнің, жойылу мен үмітсіздіктің жалғасы. Сондықтан, бейбіт өмір үшін ұрыс тоқтатылуы керек, ол дереу тоқтауы керек. Мен барлық тараптарды осы үндеуге құлақ асуға шақырамын.
Газадағы қырғынды Ислам Ынтымақтастық Ұйымы да айыптады. Cонымен қатар, Иракта, Түркияда, Иорданияда, Сирияда Израильдің бұл палестиналық анклавты бомбалауына қарсы ауқымды шерулер өтті.
Таяу Шығыстағы ахуалдың қайта шиеленісуіне Шығыс Иерусалимде еврейлер қоныстанушыларының араб отбасыларын үйлерінен күшпен көшіру әрекеті себепші.
Арыстан Рысбек
