Жаңалықтарды Telegram арнамыздан оқыңыз!Жамбыл облысының тұрғыны Әйгерім Әбдірайым туған әкесі Әмзе Әбілқасымовты іздеп Ұлттық арнаның «Қымбат жандар» тележобасына хат жазған еді. Бағдарламаның кезекті санында ол өмір бойы көрмеген әкесімен кездесті.
Әйгерімнің айтуынша, ата-анасы сәби кезінде ажырасып кеткен. Нағашыларының қолында өскен ол 2015 жылдан бастап туған әкесін іздеуге оқталады. Алайда тұрмыс құрған соң іздеу аяқсыз қалып, бағдарламаның көмегіне жүгінеді.
«Әкемді іздеуге анам қарсы болды. Олардың не үшін ажырасқанын білмеймін, әкеме ешқандай өкпем жоқ. Тек мені неге іздемеді екен деген бір ғана сұрағым бар», - дейді Әйгерім.
Бағдарлама ұжымы оның әкесін іздеп тапты.
Әмзе Әбілқасымов Алматы облысы Іле ауданының тұрғыны. 2001 жылы екінші рет шаңырақ көтерген. Жары Майра екеуі 2 қыз тәрбиелеп отыр.
«Әйгерімнің анасымен 1993 жылы үйленген едік. Тұңғыш ұлымыз шетінеп кетті. Кейін егіз қыздарым дүниеге келді. Ол кезде ажырасқан едік. Егіздердің бірі босанған кезде көз жұмды. Екіншісінің атын Әйгерім деп өзім қойдым», - деді әкесі.
Осылайша студияда әкесі мен қызы 24 жылдан кейін қайта қауышты.
