Жаңалықтарды Telegram арнамыздан оқыңыз!Бұл туралы бүгін Президент Қасым-Жомарт Тоқаевтың қабылдауында болған Қазақстан мұсылмандары діни басқармасының төрағасы, Бас мүфти Наурызбай қажы Тағанұлын хабарлаған. Ақорда кездесу барысында талқыланған мәселелер мен мүфтияттың алдағы жоспарлары туралы ақпарат берді.
Дереккөзіне сүйенсек, Мемлекет басшысына Қазақстан мұсылмандары діни басқармасының пандемия кезінде жасаған қайырымдылық шаралары жайында мәлімет айтылған.
«Наурызбай қажы Тағанұлы Қасым-Жомарт Тоқаевқа мүфтият алдағы уақытта «Ихсан» ілімін, Абайдың кемел адам концепциясын кеңінен дәріптеп, насихаттау жұмыстарымен айналысатынын жеткізді. Кездесу барысында Қазақстан мұсылмандары діни басқармасының алдағы жоспарлары туралы да сөз болды. Атап айтқанда, Ислам академиясын құру, Ислам және теология кітапханасын салу, еліміздегі мешіттердің архитектурасын қазақы салт-санаға сай қалыптастыру мәселелері айтылды»,-деп хабарлайды Ақорда.
Бұдан өзге, Наурызбай қажы Тағанұлы індет кезінде мүфтият тарапынан ауруханаларға жасанды тыныс алу, оттегі аппараттары мен медициналық құрал-жабдықтар, мұқтаж жандарға дәрі-дәрмектер, мешіттердің жанындағы тігін цехтарында тігілген бетперделер мен қорғаныс киімдерінің тегін таратылғанын атап өтті. Сонымен қатар «Ел үлесі – пәтерде» акциясы аясында 314 баспана берілгенін айтқан. Бұдан бөлек имамдардың білімін көтеру, кадр даярлау мәселелері жайында баяндады.
Кездесу соңында Президент Қасым-Жомарт Тоқаев Қазақстан мұсылмандары діни басқармасының жұмысын жоғары бағалап, алдағы бастамаларына сәттілік тіледі.
